04:40 - 28/03/2020

وەسیەتەكەی پێشەوا قازیی و بارودۆخی كورد لەدوای ڕوخانی كۆمار‌

ئەوەی كە لە خوارەوە دەخوێندرێتەوە تەواوی ئەو وەسیتەیە كە پێشەوا قازی محەمەد لە كۆتاییەكانی ژیانیدا كردوویەتی و تیایدا چەندین دەردی بێ دەرمانی كوردی خستوەتەڕوو، بەجۆرێك ئەگەر لە دوای لە سێدارەدانی كورد لەسەر ئەو وەسیەتە بڕۆشتایە دوور نەبوو بەشوێنێكی دیكە بگەشتایە، ئاخر ئەوەتەی كورد هەیە گیرۆدەی خۆخۆریی و پەرتەوازەییە، ئەوەتەی هەیە فریوی نەیارەكانی دەخوات و لەناوخۆشدا پاشقول لەیەكتری دەگرن...ئەوەی كە دەیخوێنیتەوە بەوردی سەرنجی بدە بزانە كورد لە كوێی وەسیەتەكەدایە؟

بسم الله الرحمن الرحیم

نەتەوەی زۆرلێکراو، بێ بەش و چەوساوەی کورد، برایانی بەڕێز، لەدواین ساتەکانی ژیاندا بابەتگەلێکتان وەک ئامۆژگاری پێ دەڵێم.
بۆ ڕەزامەندی خوا دەست لەدوژمنایەتی یەکتر هەڵگرن، یەکبگرن و بۆ پشتیوانی لەیەکتر هەڵسن، لەبەرامبەر دوژمن دا ڕاوەستن، خۆتان بەنرخێکی کەم بە دوژمنەکان مەفرۆشن، دوژمن تەنیا بۆگەیشن بەقازانجەکانی ئێوەی دەوێ، پاش ئەوە ئیتر زیاتر لەتڵپەیەک نین.

دوژمنانی نەتەوەی کورد زۆرن، زۆردارن، نامەردو بێ ویژدانن، ڕازی سەرکەوتنی هەر نەتەوەیەک یەکێتی و پێکەوەبوونە، ئازادی نەتەوەیەک پێویستی بەپشتیوانی گشت نەتەوەیەکە، نەتەوەی یەکنەگرتوو هەمیشە لەژێر دەسەڵاتدایە.

ئاخر ئەمانە کەی لەقورئان و سوێند تێ دەگەن؟ وەفا لەلای ئەم کۆمەڵەیە شمەکی بازاڕە

ئێوەی نەتەوەی کورد شتێکتان لەنەتەوەکانی دیکە کەمتر نیە، بەپێچەوانەشەوە، پیاوەتی، غیرەت و ئازایەتی ئێوە فرە زۆرترە، ئەو نەتەوانەی لەبەندی دیلی ڕزگاریان بووە یەکگرتووبوون و تەواوو.
ئێوەش دەتوانن بەیەکگرتوویی و هاوپێوەندی زنجیری دیلێتی بپچڕێنن، ئیرەیی و خیانەت و خۆفرۆشی وەلانێن، ئیتر فریوی دوژمنان مەخۆن، دوژمنی نەتەوەی کورد لەهەر تاقم و گرووپ و ڕەنگ و ڕەگەزێک هەر دوژمنە، بێ بەزەیی و بێ ویژدانە، ئێوە لەگیان یەکبەردەدا تا خۆی بەئامانجەکانی بگا، بەبەڵێنگەلی درۆزنانە ئێوە دەخەڵەتێنێ.

لەئیسماعیل ئاغای شکاک تا جەوهەر ئاغای برای و هەمزە ئاغای مەنگوڕو چەند قارەمانێکی دیکە، فریوی ئەم زۆردارە مەلعونانەیان خواردو ناپیاوانە شەهیدیانکردن، هەموویان بەقورئان و سوێند فریودا، ئاخر ئەمانە کەی لەقورئان و سوێند تێ دەگەن؟ وەفا لەلای ئەم کۆمەڵەیە شمەکی بازاڕە.

لەڕێگەی خواو بۆ ڕەزامەندی خوا پشتی یەکتر چۆڵ مەکەن و یەکگرتووبن، دڵنیابن ئەگەر دوژمن هەنگوینتان پێ بدا، تێکەڵ بەژەهرە، فریوی سوێندە درۆزنەکانی مەخۆن، ئەگەر هەزارجار سوێندبخۆن دووبارە هیچ ئامانجێکیان جیا لەلەنێوبردنی ئێوە نیە.

لەدوایین کاتژمێرەکانی ژیانمدا خوا بەشایەتی دەگرم کەلەڕێگای ئازادیی و بەختەوەریی ئێوەدا گیان و ماڵی خۆمم بەخت کردوو لەهیچ هەوڵێک کۆتاییم نەکرد، لەلای ئەمانە، کوردبوونی ئێوە تاوانە، سەروگیان و ماڵ و شەرەفی ئێوە لەلایان حەڵاڵە.

ئەوان چونکە لەگۆڕەپانی شەڕدا ناتوانن لەبەرانبەر ئێوەدا ڕاوەستن، هەمیشە هانا بۆ فێڵ و تەڵەکە دەبەن، شاو دەست و پێوەندییەکانی چەندجاران پەیامیان نارد کەبۆ وتووێژ ئامادەن و مەیلی خوێنڕشتنیان نیە، بەڵام من دەمزانی ئەوان درۆدەکەن، ئەگەر خیانەت و خۆفرۆشی و فریوخواردوویی هێندێ لەسەرۆک عەشیرەتەکان نەبووایە، کۆمار هیچ کات شکستی نەدەخوارد.

چ نیعمەتێک لەوە گەورەترە کەسەرو ماڵ و گیانم لەڕێگای نەتەوەو نیشتمانم دا بەخت بکەم.

وەسیەت دەکەم مناڵەکانتان فێری عیلم و زانست بکەن، نەتەوەی ئێمە شتێکی لەنەتەوەکانی تر کەمتر نیە، جیا لەزانست و عیلم.

فێری زانست ببن تا لەکاروانی مرۆڤایەتی دوانەکەون، زانست چەکی لەنێوبردنی دوژمنانە؛ دڵنیابن ئەگەر بەدووچەکی (یەکیەتی) و (زانست) پۆشتە ببن، دوژمنان کارێکیان بۆ ناچێتە پێش.
ئێوە نابێ بەمردنی من و براکان و ئامۆزاکانم ترس بچێتە دڵتانەوە، هێشتا قارەمان گەلێکی زۆۆر دەبێ گیان فیداکەن تا داری ئازادی کوردستان بگاتە بەرهەم، دڵنیام پاش ئێمەش قارەمانگەلێکی دیکە هەن کەفریوبخۆن، بەڵام هیوادارم مەرگی ئێمە ببێتە دەرس و عیبرەت بۆ سەرجەم خەباتگێڕانی ئازادی کوردستان.

وەسیەتێکی دیکەم بۆ دڵسۆزانی نەتەوەی کورد هەیە، لەخوای گەورە داوای ئازادی نەتەوەی خۆتان بکەن.
شایەد لەخۆتان بپرسن بۆمن سەرنەکەوتم؟ لەوەڵامدا دەبێ بڵێم بەخوا سەرکەوتووی ڕاستەقینە منم، چ نیعمەتێک لەوە گەورەترە کەسەرو ماڵ و گیانم لەڕێگای نەتەوەو نیشتمانم دا بەخت بکەم.
باوەڕ بکەن من جاران داوام لەخوا کردووە ئەگەر بمرم بەشێوەیەک گیان لەدەست بدەم کەبەڕوومەتی سورەوە لەلای خواو پێغەمەر و میللەتەکەمدا ئامادەبم، وەها مردنێک سەرکەوتنی ڕاستەقینەیە.
هیچ کەسی مافی ئیرەیی و بەخیلی نیە، هەموو لەماڵی خۆیاندا ئازادن، هەرچی لەدەستتان دێ بۆ ئازادی کورد کۆتایی مەکەن، ئیتر نابێ لەسەر ڕێگای ئەو کەسانەدا کەبەرپرسیاریەتی دەگرنە دەست بوەستن، لەبەردخستنە سەر ڕێگە دەست هەڵگرن و ئەرکەکانتان بەباشی ئەنجام بدەن.
دڵنیابن برا کوردەکەتان لەدوژمنی بێگانە باشترە، ئەگەر من بەرپرسیارییەتیم وەئەستۆ نەگرتبایە ئێستا لەپای چێوەی داردا نەبووم و لەلای بنەماڵەکەم ڕۆژەکانم دەبردە سەر، بەڵام ئەرکی من بەرزترین ئامانجم بوو، تاپێی کیان ڕاوەستام؛ بەهیوای خواوەندی گەورە لەئاکام دا بەسەر دوژمنان دا سەردەکەون.

ئەگەر من بەرپرسیارییەتیم وەئەستۆ نەگرتبایە ئێستا لەپای چێوەی داردا نەبووم و لەلای بنەماڵەکەم ڕۆژەکانم دەبردە سەر

۱ ـ بڕواتان بەخوا و (ماجاء من عندالله) و پێغەمبەری ئەکرەم هەبێ و ئەرکەدینیەکانی خۆتان بباشترین شێوە بەڕێوە ببەن.
۲ - یەکیەتی و هاوپێوەندی ڕەمزی سەرکەوتنە، ئیرەیی و خۆفریودان وەلابنێن و لەوەرگرتنی بەرپرسیاریەتی و خزمەتکردن دا لەگەڵ یەکتر کێ بڕکێ مەکەن.
۳ ـ زانست و ئاگایی خۆتان بەرنەسەرێ، تافریوی دوژمنان نەخۆن.
٤ـ هیچ کات دوژمن بەدۆست مەزانن، چونکە دوژمنی نەتەوەو نیشتمان و دینتانە.
٥ـ خۆتان بۆ چەند ڕۆژ ژیان لەم دوونیا لەناوچووەدا مەفرۆشن، مێژوو سەلماندویە کەدوژمن بەچوکترین بیانویەک دەست بۆکوشتارو سەرکووت دەبا.
٦ـ خیانەت بەیەکتر مەکەن، نەخیانەتی سیاسی و ماڵی و گیانی و نامووسی، خیانەتکار لەلای خواو گەل ڕووڕەشەو خیانەت لەئاکامدا بۆی دەگەڕێتەوە.
۷ـ لەتەک ئەو کەسانەدا بن، بێ خیانەت ئەرک بەڕێوەردن و هاوکاریی بکەن. هیچ کات مەبنە سیخوڕی بێگانە.
٨ـ ئەو شوێنانەی لەوەسیەت نامەکەدا ئاماژەم پێ کردوون " مزگەوت و قوتابخانەو نەخۆشخانە" هی خۆتانن بەباشترین شێوە کەڵکیان لێ وەرگرن.
۹ـ واز لەشۆڕش مەهێنن تالەژێر دەستەیی دەرباز دەبن، ماڵی دونیا هیچ نیە، ئەگەر نیشتمانێکیتان هەبێ، سەربەخۆیتان هەبێ و ماڵ و خاک و نیشتمان هی خۆتان بێ، ئەوکات هەموو شتێکیتا دەبێ، هەم سامان هەم دەوڵەت هەم ئابڕوو هەم نیشتمان.
۱۰ـ گوومان ناکەم جیا لەمافی خوا حق الله مافێکی دیکە لەئەستۆم بێ، سەرەڕای ئەمەش ئەگەر کەسێک هەست دەکات قەرزێکی بەلامەوەیە بچێتە لای میراتگرانم.

تا دەست نەدەنە دەستی یەکتر سەرکەوتن مسۆگەر نابێ، لەیەکتر زۆر مەکەن چونکە خواوەند دوژمنی زۆردارانە.
هیوادارم وتەکانم وەرگرن، خواوەند ئێوە بەسەر دووژمناندا سەربخات.

مەبەستی ئێمە ئامۆژگاری بوو وتمان، سپاردمانن بەخواو ڕۆیشتین.

خزمەتگوزاری نەتەوەو نیشتمان قازی محمد