11:23 - 13/06/2019
عادل عەبدولمەهدی سەردانی هەرێم دەكات
- عادل عەبدولمەهدی سەرۆكی ئەنجومەنی وەزیرانی عێراق، دێتە هەرێم و لەگەڵ بەرپرسانی كوردستان سێ پرس و تەوەری سەرەكی تاوتوێ دەكات.
بڕیارە ئەمڕۆ عادل عەبدولمەهدی سەرۆك وەزیرانی عێراق بێتە هەولێر و لەگەڵ بەرپرسانی هەرێم كۆببێتەوە، بەپێی ئەو زانیاریانەی پەیسەرپرێس دەستی كەوتوون، سەرۆك وەزیرانی عێراق داوای رادەستكردنی نەوت دەكات و پەیامی ئەردۆغانیش دەداتە بەرپرسانی كوردستان كە توركیا ئامادەیە گرێبەستە 50 ساڵیەكەی لەگەڵ هەرێم هەڵوەشێنێتەوە.
پێشتر سەرۆك وەزیرانی عێراق داوایكردووە پێش ئەوەی بە هەماهەنگی عێراق و توركیا، گرێبەستەكە هەڵبوەشێنێتەوە، ئەنكەرە دەرفەت بداتە بەغداد بۆ ئەوەی بەلێكتێگەیشتن لەگەڵ هەرێم پرسی نەوت و غاز چارەسەر بكات.
تەوەرێكی تری سەردانەكە پەیوەندی بەدانانی وەزیری دادی حكومەتی فیدراڵیەوە هەیە، كە ئەگەر یەكێتی و پارتی لەسەری رێكنەكەون ئەوە بەغداد خۆی ئەو پۆستە پڕدەكاتەوە.
هەرچی سەبارەت بە تەوەرەی سێیەمە، عادل عەبدولمەهدی دەیەوێت لەگەڵ هەرێم پرسی گەڕانەوەی پێشمەرگە بۆ ناوچە جێناكۆكەكان و ئاساییكردنەوەی دۆخی ئەو ناوچانە لەگەڵ بەرپرسانی هەرێم تاوتوێ بكات.
زانیارییەكان ئاماژە بەوەدەدەن كە بەغداد پەلەیەتی لە رێككەوتنی هەرێم و بەغداد لەسەر پرسی بودجە، بەوپێیەی حكومەتی فیدراڵی ئامادەكاری دەكات بۆ بودجەی ساڵی 2020.