09:48 - 02/11/2019
ترەمپ بەڵێنی پاراستنی كوردی داوە
لە تازەترین چاوپێكەوتنیدا مەزڵوم كۆبانێ دەربارەی دۆخی ڕۆژئاوای كوردستان ڕایگەیاند:
دۆخەكە زۆر ئاڵۆزە و هیچ متمانەیەكیان بە ئەسەدەو پۆتین نییە و ترەمپیش بەڵێنی
پاراستنی كوردی داوە.
فەرماندەی گشتی هێزەكانی سوریای دیمكرات مەزڵوم كۆبانێ ڕایگەیاند: هیچ
بڕوایەكیان بە ڤلادمێر پۆتین و هێزەكانی نییە لە سوریا و ئومێدیشیان بە بەشار
ئەسەد نییە.
وتیشی سەرەڕای نەبونی متمانەی تەواوەتیان بەو هێزانە بەڵام دەبێت سیاسەتی
خۆیان بكەن و دانوستانیان لەگەڵ بكەن.
وتیشی:"هیچ متمانەیەكمان بە حكومەتی سوریا نییە، بەڵام جگە لە ڕێككەوتن
هیچ چارەسەرێكی دیكە نییە بۆ كێشەكانی سوریا، بۆیە بە ناچاری ڕێككەوتنمان
كردووە."
كۆبانێ وتیشی: پێویستە وڵاتانی ئەوروپا گەرەنتیی جێبەجێكردنی ئەو ڕێككەوتنە
بدەن.
لەوەڵامی پرسیاری ئایا دانوستانەكانتان لەگەڵ ئەسەد لە چ ئاستێكدایە؟
مەزڵوم كۆبانێ وتی: دانوستانەكانیان لەگەڵ حكومەتی سوریا بە شێوەی
ناڕاستەوخۆ و لە ڕێگەی ڕوسیاوەیە، كە هاوپەیمانی دیمەشقە و هەموو
ڕێككەوتنەكانیشیان لە چوارچێوەی بەرگریكردنە لە گەل و ئازادیی سیاسەت و كلتورى
کوردى. هەروەها فەرماندەی گشتیی هەسەدە ڕاشیگەیاند، گفتوگۆیان لەگەڵ ئەمریكییەكان
كردووە و گرەنتیی پاراستنی كوردەكانیان بە هەسەدە داوە، بەڵام بە وتەی كۆبانی
ئەمریكا لە جێبەجێكردنی بەڵێنەكانیدا سستە.
مەزڵوم كۆبانێ دەربارەی بڕیاری كشانەوەی ئەمریكا لە ڕۆژئاوای كوردستان
وتیشی: "ئەو بڕیارە هەڵكردنی گڵۆپی سەوز بوو بۆ هێرشەكانی توركیا و
بۆردومانكردنی ناوچە كوردییەكان."
سەبارەت بە بڕیاری دەستگیركردنی
لەلایەن توركیاوە مەزڵوم كۆبانێ فەرماندەی گشتی هێزەكانی سوریای دیموكرات وتیشی:
''جگە لەوە چاوەڕوانی هیچی دیكە لە كەسێك ناكەین كە پرۆژەی كوشتوبڕی گەلەكەمانی بە
ئاشكرا ڕاگەیاندووە.''
دەربارەی چارەسەری دۆخی ڕۆژئاوی كوردستان وتی:
ئەوان دەیانەوێت بە زوترین كات دۆخەكە چارەسەر ببێت، هەرچی زوو ترە پێویستە توركیا
لە ڕۆژئاوای كوردستان بكشێتەوە و هێز نەنێرێتە سەر ئەو ناوچانەی هاوڵاتیانی مەدەنی
تێدایە.
وتیشی: ئەوان هیچ باوەڕیەكیان بە هیچ لایەنێكی
دەرەكی نییە و كاری خۆیان بۆ پاراستنی خۆیان دەكەن و پلانیان هەیە كە رووبەرووی
هەر مەترسیەك ببنەوە لەسەر ڕۆژئاوای كوردستان.
ناوبراو وتیشی ئێستا كورد لە جیهاندا دەنگی
دەبیسترێت، ئەوان داوای مافی خۆیان دەكەن و كاردەكەن لە پێناو بەدیهێنانی
مافەكانیان بەشێوەیەكی دیمكراتیانە.
سەرچاوە:لاریبوبلیكای ئیتاڵی