01:52 - 27/01/2022
نازم ده‌باغ: ئێران هەوڵ دەدات پارتی و یه‌كێتی بەیەک کاندیدەوە بچنە بەغدا
نوێنەرى حکومەتى هەرێم
رایدەگەیەنێت؛ ئێران نیگەرانە لە پەرتەوازەیى کورد و بونى دو کاندید بۆ پۆستى
سەرۆک کۆمار. دەشڵێت: ئەگەر زیان بە بەرژەوەندییەکانى ئێران بگەیەنرێت لە عێراق،
ئەو وڵاتە هەڵوێستى دەبێت.
نازم دەباغ، نوێنەرى حکومەتى هەرێم لە تاران،
لەمیانى بەشداریى کردن لە بەرنامەى (رۆژەڤ)ى کەناڵى (KNN)دا، رایگەیاند: پێش هەڵبژاردن قائانى هاتوەتە
کوردستان و سەردانى مەسعود بارزانى و بافڵ تاڵەبانى کردووە و پێى وتون کە
نەبنە لایەنێک لە پەرتکردنى ماڵى شیعى لە عێراق.
دەباخ وتیشى،" من پێم وایە ئێران وەک وڵاتێک
بەرژەوەندى خۆى هەیە و هەر لایەنێک بیەوێ زیان لە بەرژەوەندییەکانى ئێران بدات
هەڵوێستى دەبێت و هەنگا و بۆ پاراستنى بەرژەوەندییەکانى خۆى دەنێت".
لەبارەى بونى دو کاندید لە
نێوان پارتى و یەکێتى بۆ پۆستى سەرۆک کۆمار، نوێنەرى حکومەتى هەرێم لە تاران
دەڵێت: ئێران لەسەرەتاوە تا ئەمڕۆ هەڵوێستێکى رون و ئاشکراى هەبووە کە لەگەڵ
ئارامى و ئاسایشە لە هەرێمى کوردستان، بەتایبەت تەباى نێوان یەکێتى و پارتى، بەڵام
بونى دوو کاندید بۆ پۆستى سەرۆک کۆمار ناتەبایى دروستکردووە، بۆیە ئێران هەوڵ
دەدات نزیکبونەوە بکرێت و بەیەک کاندیدەوە بچنە بەغداد.
هەروەک رونیشى کردەوە، ئەم هاوپەیمانیە سێ قۆڵیەى
نێوان حەلبوسى و سەدر و پارتى نیگەرانییەکى دیکەیە بۆ ئێران، چونکە ئێران لەگەڵ
ئەوە نەبوو کورد بچێتە ناو ئەو هاوپەیمانییە تا ئەوکاتەى نێوماڵى شیعە بەیەکەوە
نەبێت.
نازم دەباغ جەختیشى کردەوە، ئێران لەگەڵ ئەوەیە
ئارامى و ئاسایشى عێراق بپارێزێ، بەڵام ئەگەر لایەنێکى شیعە بیەوێ زۆرینە بێت و
لایەنەکانى دیکە فەرامۆشبکات بەدڵنیاییەوە نیگەران دەبێت.