11:24 - 12/06/2022
هەرێم بۆ رێگەگرتن لە تاى خوێن بەربوون دەستى بە جوڵە کرد
وەزارەتی كشتوكاڵی هەرێم
شەش ڕێكاری گرنگ بۆ ڕێگریكردن لە تای خوێنبەربوون بڵاوكردەوە.
بەپێی ڕاگەیەندراوێكی
وەزارەتی كشتوكاڵ و سەرچاوەكانی ئاوی هەرێم تێیدا هاتووە، لە پێناو ڕێگریكردن لە بڵاوبوونەوەی
تای خوێنبەربوون لە هەرێمی كوردستان، كە ئێستا لە هەندێك لە پارێزگاكانی عێراقدا بڵاوبووەتەوە،
بڕیاردراوە چەند ڕێكارێك بگیرێتەبەر.
لەوانە:-
یەكەم/ پێویستە سەربڕین
لە سەربڕخانە فەرمییەكان بێت و بەپشكنین و مۆری فەرمیی ڤێتێرنەری بچێتە بازاڕ و سەربڕین
لەسەر ڕێگەكان و لاكۆڵانەكان قەدەغەبكرێن.
دووەم/ پشكنینی ئاژەڵەكان
پێش سەربڕین و دوای سەربڕین بەمەبەستی دڵینابوون لەتەندروستیی ئاژەڵەكە ئەنجامبدرێت.
سێیەم/ پێویستە ڕێكارە
تەندروستییەكان بۆ پۆشینی جلوبەرگی تایبەتمەند و كەلوپەلی سەربڕین لەسەربڕخانەكاندا
ڕەچاوبكرێت.
چوارەم/كەرەنتیەنەكانی
ئاژەڵ لە دەروازە و فڕۆكەخانەكاندا و پێویستە پشكنینی وورد بۆ ئەو ئاژەڵانە بكەن كە
دەهێندرێنە هەرێمی كوردستان بۆ مەبەستی دڵنیابوون لە تەندروستیی ئاژەڵەكان.
پێنجەم/ وەزارەتی
كشتوكاڵ ڕێكاری پێویست دەگرێتەبەر بۆ مەبەستی دابینكردنی دەرمانی شووشتنی ئاژەڵ بۆ
لەناوبردنی مشەخۆری دەرەكی (قڕنە) كە هۆكاری سەرەكیی گواستنەوەی تای خوێنبەربوونە
لە نێوان ئاژەڵەكان و ئەم هەلمَەتە لەسەر ئاستی هەرێمی كوردستان ئەنجامدەدرێت.
شەشەم/ كۆنتڕۆڵكردنی دیاردەی
هێنانی ئاژەڵ بەشێوەی نافەرمی لە سنوورەكانی دەرەوە و نێوان هەرێم و عێراقی فیدراڵ،
هەروەها ڕێگەگرتن لە هێنانی ئاژەڵ لەو پارێزگایانەی كە نەخۆشی تای خوێنبەربوونی تێدا
بڵاوبووەتەوە.