عیراق

10:13 - 10/06/2020

شەش تەوەری گفتوگۆی نێوان ئەمەریكا و عێراق ئاشكرا دەبێت‌

پەیسەر


بە پێی ڕاپۆرتێكی رۆژنامەی شرق الاوسط  عێراق و ئەمەریكا لە گفتوگۆی بەردەوامدان  و بڕیارە لە چەند کاتژمێری داهاتوو گفتوگۆی ستراتیژی نێوان واشنتۆن و بەغدا لەڕێگەی ڤیدیۆ کۆنفرانسەوە بەڕێوەبچێت و لەو گفتوگۆیەدا چەند تەوەرێک لەنێوان هەردوولا تاوتوێ بکرێت کە گرنگترینیان مانەوەی هێزەكانی ئەمریکایە لە عێراق و پەیوەندییەكانی نێوان ئێران و عێراقە..  

دەیڤید هیڵ، یاریدەدەدەری وەزیری دەرەوەی ئەمریكا بۆ كاروباری سیاسی كە سەرۆكایەتی شاندی ئەمریكا دەکات لە دانوستانەکاندا ئاشكرای كردووە، لایەنی ئەمریكی جەخت لەسەر شەش خاڵی سیاسی و سەربازی و ئابوری گرنگ دەكاتەوە كە كورتەكەی لەمانەی لای خوارەوەدایە:.  

1-عێراق چەند ڕێوشوێنێك بگرێتەبەر بۆ پاراستنی دیبلۆماتکار و سەربازانی ئەمریكا و هێزەكانی سەر بە هاوپەیمانی نێودەوڵەتی دژی داعش بەشێوەیەكی گشتی لەسەر خاكی عێراق.
2-ڕاگرتنی پشتبەستن بە ئێران بۆ بازرگانیكردن بە وزەی كارەبا و پەلەكردن لە دۆزینەوەی جێگرەوەیەكی تر.

3-دانانی سنورێك بۆ ڕۆڵی ئێران لە تێكدانی ئارامی لە عێراق و ناوچەكە و چارەسەركردنی دەستوەردانی گروپە میلیشیاكانی لەلایەن ئێرانەوە، هەروەها سنورێك بۆ دەستوەردانی ئەو وڵاتە لە كاروباری ناوخۆی عێراقدا.

4-كرانەوەی عێراق بەڕووی دراوسێ عەرەبەکانیدا و هاندانی پلانەكانی حكومەت لەو بارەیەوە كە بەمدوایانە گرتویەتیەبەركە بریتیە لە نزیك بوونەوە لە وڵاتانی عەرەبی و لەناو ئەوانەشدا عەرەبستانی سعودی.

5-دانانی ڕێوشوێنێك بۆ چۆنیەتی هاریكاریی عێراق لە بەرەنگاریكردنی پەتای كۆرۆنا و دانانی پلانێك بۆ تێپەڕاندنی قەیرانی ئابووری كە بەهۆی دابەزینی نرخی نەوتەوە دروستبووە و عێراقیش بەڕادەیەكی زۆر پشتی بەداهاتی نەوت بەستووە.

6-یەكلاكردنەوەی چارەنووسی هێزەكانی ئەمریكا و هاوپەیمانێتی نێودەوڵەتی لە عێراقدا و ڕێگری لە سەرهەڵدانەوەی جارێكی تری چەكدارانی داعش.
وەك چاودێران باسی دەكەن پێدەچێت لەنێو گفت و گۆكاندا قسەوباسی دیكە بێتە پێشەوەو بۆچوونیان لە بارەوە ئاڵوگۆڕ بكرێت.