ڕاپۆرتی کوردستانی

11:17 - 21/01/2021

حاجی بابەشێخ یەكەم سەرۆك وەزیرانی كوردستان لە نێوان یارو نەیاردا‌

پەیسەر

حاجی بابەشێخ یەكەم سەرۆك وەزیرانی كۆماری كوردستان، هەرچەندە پێشینەی سیاسی نەبوو لەناو (ژ.ك)دا، بەڵام لەبەر كەسایەتی دیارو زانایەتی و پاشخانی بنەماڵەكەیان ، و لەسەر پشتیوانی زۆری قازی محمد و هاوڕێكانی كارەكانی بەڕێوەبرد، گەرچی نەیارەكانی ئەو پیاوە دوای لە سێدارەدانی قازییەكان بۆچوونی جیاوازیان هەیە و قسەی جۆراوجۆری لەبارەوە دەكەن، بەڵام پێشینەی ژیانی ئەو پیاوە شتێكی ترمان پێدەڵێت.

دامەزراندنی ئەو كۆمارە پێویستییەكی مێژوویی و دەرئەنجامێكی جەنگی جیهانیی دووەم  بوو تا كوردیش بتوانێت بۆ دەستەبەركردنی مافەڕەواكانی ئەزموونی خۆی تاقی بكاتەوە

یەكێك لە شانازییە هەر گەورەكانى بزاڤى ڕزگاریخوازی كوردى لە قۆناغی مێژووی هاوچەرخیدا، دامەزراندنی دەسەڵاتێكی سیاسی بوو لەژێر سیستەمی (كۆمار)دا. ئەویش دامەزراندنی (كۆماری كوردستان) بوو لە (22ی كانوونی دووەمی1946)دا ی شاری مەهابادی ناوچەی موكریانى خۆرهەڵاتی كوردستان، لە هەلومەرجێكدا هاتە دنیای بوون كە دووەمین جەنگی جیهانی كۆتایی هاتبوو. واتە ئەو كۆمارە بە پشتیوانیی یەكێك لە براوەكانی جەنگ دامەزرا كە ڕووسەكان بوون،  بۆیە دامەزراندنی ئەو كۆمارە پێویستییەكی مێژوویی و دەرئەنجامێكی ئەو جەنگە جیهانییە بوو تا كوردیش بتوانێت بۆ دەستەبەركردنی مافەڕەواكانی ئەزموونی خۆی تاقی بكاتەوە. ئەوەشی زیاتر قورسایی بەو كۆمارە بەخشی دامەزراندنی حزبی دیموكراتی كوردستان بوو لە  16ی ئەیلوولی 1945 دا، بەوەی توانی وەك پارتێكی سیاسیی كوردی رابەرایەتیی سیستەمی سیاسیی كۆمار بكات و لەسەر بنەمایەكی حزبیی هاوچەرخ، كاروبارەكانی بەرٍێوە ببات. بەو هۆیەشەوە توانی زۆربەی كۆمەڵانی خەڵكی كوردستانی ژێر دەسەڵاتی كۆمار لە دەوری خۆی كۆ بكاتەوە پێكهاتەكەی لە 13 وەزارەت پێكهاتبوو.
 
یەكەم سەرۆك وەزیرانی كۆماری كوردستان –لە مەهاباد – كە جاران پێی گوتراوە (ڕەئیسی هەیئەت ڕەئیسەی میللیی کوردستان). پیاوێكی لاغر ئەندام و ڕدێن چەرموو، پیواێم بە ویقارێكی گەورەو بەناوبانگێكی هەمیشەییەو، بەئەدەبەوە پێیان دەگوت: ئاغای حاجی بابەشێخ، ئەو هاوڵاتیەكی خاك خەڵکی شارستانی بۆکانی رۆژهەڵاتی كورستان. وەك بە شێك لە سەرچاوەكان باسی دەكەن  لە سەردەمی ڕاگەیاندنی جمهووری کوردستان (1946)دا تەمەنی 68 ساڵ بوو، بەو پێیە  لە دایك بووی 1878 بووە و 15 ساڵ لە پێشەوا قازی محمد گەورەتر بووە. حاجی بابەشێخ لە بنەماڵەی سەیدەکانی زەمبیل بوو ە لەناوچەی بۆكان، كە بە زانایی و خزمەتی دین و نەتەوە بەناوبانگ بوون، و لە کارو باری شەرعی دا زانا و کارامە بووە، هەڵسوکەوتی لەگەڵ خەڵک باش بوو.  هەرچەندە ئەندامی کۆمەڵەی ژ.ک نەبووە وەك زۆرینەی ئەندامە دیارەكانی كۆماری كوردستان،  بەڵام لە ساڵی 1945 لە گەڵ بزووتنەوەی نەتەوەیی و ڕێكخستنەكانی حیزبی دێمۆکراتی كوردستانی ئێران کەوتوە . لە ساڵی 1954 لە دێی تورجان ماڵاوایی لە ژیان کردووە.
كاتێك سەرنجی هەركەسێك دەچێتە سەر یەكەم كۆماری كوردستان كە پایتەختەكەی لە مەهاباد بوو، بیر لەوە دەكاتەوە ئەو كۆمارە جگەلە سەرۆك كۆمار سەرۆك وەزیران و 13 وەزرارەتی هەبووە، بەڵام كاتێك دێتە سەر قوربانیەكانی تەنها قازی محمد سەرۆك كۆمار و وەزیری بەرگریی كە ئەوكات پێیان گوتووە وەزیری جەنگ و سەیفی قازی كە ئامۆزای قازی محمد بووە  و بەرپرسی پەیوەندییەكانی كۆمار سەدری قازی برای قازی محمد ناویان ماوەتەوە لە كاتێكدا هەرسێكیان لەیەك كات و ساتدا لە سێدارە دراون، هەربۆیە دەكرێـت بپرسین ئەی ئەوانی دیكە چییان لێ بەسەر هات و سەرئەنجام بەكوێ گەشتن. كاتێكیش بەدوای وەڵامەكەدا دەگەڕێین ڕێمان لە زۆر پرسیاری بێ وەڵام و چەندین گرێی نەكراوە دەكەوێـت.
 
لەبارەی سەرۆك وەزیرانی ئەو كۆمارەوە كە بەدەسەڵاـی دووەمی دوای قازی محمد دێت قسەو باسی زۆر دەكرێت ، هەموو قسەو باسەكانیش لە نێوان پیاهەڵدان و شكاندنەوەدا خۆیان دەبیینەوە، دەگوترێت حاجی بابەشێخ ئەگەر كەسێكی بەتواناو خاوەن زانست و پاشخانێكی خاوێن و هەستی نەتەوایەتی بەهێز نەبوایە، چ كەسێك دەچێتە عەقڵیەوە بگاتە پلەی سەرۆك وەزیران؟ چۆن سەركردەكانی حیزبی دیموكراتی ئەوساو ستافی بەڕێوەبردنی كۆمار ڕێگەیان بەوە دەدا و لەو بارەیەوە هەڵوێستیان نەدەبوو؟ بۆچی كاتێك قازی محمد كابینەی یەكەمی كۆمارەكەی ڕادەگەیەنێت و ناوەكان دەخاتە بەردەست هیچ لەبارەی حاجی بابەشێخەوە ناگوترێـت؟ ئەمانە ئەو ڕاستییەمان بۆ دەسەلەمێنن كە بەڵێ ناوبراو خاوەنی هەموو ئەو خەسڵەتانە بووە كە بۆ سەرۆك وەزیرانی ئەو سەردەمەی یەكەم كۆماری كوردستان دەست بدات.

بەڵام ئەوەی جێگەی پرسیارە لە دوای كۆتایی هێنان بە كۆمارەكەو لەسێدارەدانی قازییەكان هەندێك قسەوباس هاتوونەتە پێشەوە كە لەڕاستیشدا جێگەی گومان و دوودڵین و پێویست بەوە دەكات مێژوو نووسان و ڕەخنەگرانی ئەو بابەتە بە جدییەوە لەسەری بدوێن و ڕووی ڕاستەقینەی ڕووداوەكان بۆ خەڵك ئاشكرا بكەن، لەوانەش: ئایا ئەو دەنگۆیانەی کە گوایە حاجی بابەشێخ پشتی لە جەنابی پێشەوا و کۆمار کردووە ڕاستە؟ ئایا ئەوەی کە دەگوترێت لە کاتی دەستبەسەر کردنی لە زیندانی تەورێز لە دوای ڕووخانی کۆماری کوردستان پەشیمان بووەتەوەو تۆبەی کردووەو هەر بەم هۆیەوە ئازاد بووە، ڕاستە؟ ئایا دەنگۆی ئیمزاکردنی نامەی لە سێدارەدانی پێشەواو هاڕێیانی لە لایەن حاجی بابەشێخەوە ڕاستە؟
 
بە پێی سەرچاوە مێژوویەکان و بە وتەی سەعید خانی هومایون خوشکەزای پێشەوای قازی محمدی نەمر و پاسەوانی یەكەم و متمانەپێكراوی خۆی، باس لەوە دەكات  جەنابی حاجی بابەشێخ یەکێک لە سەرسەخترین و تووندترین کەسایەتی و بەرپرسی ئەو کاتی کۆمار بووە دەرحەق بەو ئاغاو دەرەبەگ و عەشیرەتانەی کە بە جۆرێک دژی کۆمارو هاوکاری ڕژێمی شایەتی بوون و پێشتریش ڕابردوویەکی تەم و مژاویان هەبووە. لێرەدا سەرنج بدەنە ئەم گیڕانەوەی ئەو كەسە نزیكەی  پیشەوا قازی لەم بارەیەوە دەڵێت كاتێك قازی لەگەڵ حاجی بابەشێخ دەیانویست سەردانی ناوچەی ورۆمێ بكەن تا لە ڕەوشی ناوچەكەو پەیوەندییەكانی نێوان كورد و توركەكانی ئازەربایجان بكۆڵنەوە، هەر ئەو رۆژە هەندێك لە عەشایەرەكان هاتنە سەردانی مەهاباد و پەیمانیان بۆ كۆمار  دووپات دەكردەوە، ئەوان بە شۆرو شەوقێكی زۆرەوە بە شان و باڵی قازی محمد و حاجی بابەشێخدا هەڵیان دەدا، كاتێك ئۆتۆمبێلەكانی قازی و حاجی بابەشێخ بەرەو دەرەوەی مەهاباد رۆشتن كەژاوەی ئۆنۆمبێلی عەشایەرەكانیش شوێنیان كەوتن و تا دەرەوەی مەهاباد رۆشتن، بەڵام دواتر گەڕانەوە، لەڕێگەدا كە هێشتا زۆر لە ئاوەدانی دوور نەگەوتبووینەوە زۆرم لە خۆم كرد پرسیارێك ئاڕاستەی جەنابی قازی بكەم و حاجی بابەشێخیش گوێی گرتبوو، گوتم: جەنابی قازیی: بەشێكی زۆری ئەو سەرۆك عەشیرەتانە ڕاست ناكەن لەگەڵت، تۆ لە وتارەكەتدا زۆر بەشان وباڵی عەشایەرەكاندا هەڵتدا و لە هەمان كاتیشدا خۆشت دەزانیت  كە وانیە، باسی فەیزوڵابەگیەكانت نەكرد و مەرحەمەتی خۆتت نەنواند، بۆچی؟ ئەویش لەوەڵامدا وەك هەمیشەیی بە ڕێزو ئیحتیرامەوە گوتی: كوڕەكەم ناڕەحەت و نیگەران بوویت؟ و دواتر ئەم شیعرەی خوێندەوە كە گوتیشی بەداخەوە ناوی شاعیرەكەم بیر نەماوە:

دلا یاران سه قسمند ار بدانی
زبانی‌اند و نانی‌اند و جانی
به نانی نان بده از در برانش
نوازش کن به ‌یاران زبانی
و لیکن یار جانی را نگهدار
به جانش جان بده گر می¬توانی

واتە، ئەی دڵ دۆستەكان سێ بەشن، باش بزانە،  زمانیی و  نانی و گیانییە، ئەوەی نانییە نانی بدەرێ و لێی دووركەوە، ئەوەی كە زمانییە بیلاوێنەوە، بەڵام ئەوەیان كە گیانییە دەستی پێوەبگرەو بیپارێز، گیانت بكەرە پێش گیانیەوە تا دەتوانیت.
 
لێرەدا بوو كە حاجی بابەشێخ گوتی: قوربان ئەو ڕاست دەكات ئەو سەرۆك هۆزانەی ئەمڕۆ هاتبوون پەیمانی خۆیان نوێ كردەوە زۆرینەیان ڕاست ناكەن، ئەگەر ئەو كارە بەمنت بسپاردایە زۆریانم دادگایی دەكرد. پێشەوا قازی گوتی: حاجی بابەشێخ هەر بزووتنەوەو حكومەتێك بنەمای دەوڵەت و كارەكانی لەسەر كوشت و كوشتاری نەیارەكانی دابڕێژێت خۆی مەحكووم دەكات بە شكست و گۆڕبۆخۆی هەڵدەكەنێت و خۆی ڕسوای لاپەڕەكانی مێژوو دەكات ، ئێمە بە پشتیوانی خوا بەرنامەم وایە حكومەت بە بێ خوێنڕێژیی بەرەو پێشەوە ببەین، كاتێكیش قازی خۆی شایەتی بێ متمانەیی خەڵك و پەیمان شكاندنی سەرۆك هۆزەكان بوو وەك رەفتاری هەمیشەیی خۆی گوتی: : ئه‌ی کوردکه‌ی، بێچاره‌که‌ی، بێ پاره‌که‌ی، بێ یاره‌که‌ی، بێکاره‌که‌ی،  سەعید باس لەوەش دەكات كە ئەگەر ئێستە بوایە پێشەوا وشەی -ئاواره‌که‌ی – شی دەخستە سەری.

بە پێی ئەو وتانە حاجی بابەشێخ زۆربەپەرۆش بووە بۆ كۆمارەكەو دڵسۆزی بەڕێوەچوونی كارەكانی بووە، ئەوە نەرم و نیانی و ئارامییە لە ڕادەبەدەرەكەی پێشەوا قازی محمد بووە كە نەیهێشتووە ڕێككاری توند لە بەرامبەر ئەو كەسانەدا بگرێتە بەر كە نیەتی خراپیان هەبووە لە بەرامبەر كۆمارەكەدا.

بە شێك لە یاداشتەكان باس لەوە دەكەن كاتێكیش كۆمارەكە هەڕەشەی كەوتنی لەسەر بووە، بەپێچەوانەی پێشەوا قازی محەممەد دژی خۆ بە دەستەوەدان و تەسلیم بوولە بەرامبەر ڕژێیم و ئەرتەشی شایەتی بوو. بۆ ئیسپاتی ئەم بۆچوونە سەرنج بدە ئەم بابەتەی خوارەوە تا دنیا دنیایە کورد پیاوی ئاوا ڕەشید و زانا و عالمی وەکوو پێشەوا قازی محەممەدی نابێتەوە! لەگەڵ ئەم قسانەیدا هەناسەیەکی قوڵی هەڵدەکێشاو فرمێسکەکانی دەهاتنە خوارێ، ساڵحی قودرەت ناسراو  بەساڵحەڕەشی تورجان باس لەوە دەكات کە چەند ڕۆژ پێش دامەزرانی کۆماری کوردستان جەنابی حاجی بابە شێخ لە ڕێگای سەیدکامیلی ئیمامی شاعیرەوە هەواڵی بۆ ناردبووم کە خۆی سازو ئامادە بکات و چەند کەسی دیکەش لەگەڵ خۆیدا حازرکات وبە سواریی هەرچی زووترە خۆ بگەیەننە سابڵاغ.

فەرمووی کە ئەمنیش سێ کەسی دیکە لە کوێخاکانی تورجان حاجی میرزا عەزیز، عەبدوڵای وەستا حەمە مراد و حاجی ساڵحی خەیاتم ئاگادار کردەوەو بەرەوە سابڵاغ وەڕێکەوتین. دەمێک بوو دەنگۆی ئەوە بڵاوببۆوە کە عوروسان قەولیان بە کورد داوە کە دەوڵەتیان بۆ دامەزرێنن! فەرمووی سەر لە بەیانی بە وڵآغی چاکەوە بەرەو سابڵاغ وەڕێکەوتین و دەمەو ئێوارێ گەیشتینە ناو شاری سابڵاغ، هێشتا نەیەگشتبووینە ناوشارو لە دەرەوەی شارەوە دەماندی کە بە هەزاران کەس لە ناو شار و مەیدانەکانی ناوشار خەریکی عەلەم و ئاڵا و نیشان بەدەست بە پیادەو بە سواری لە هاتووچۆ دابوون، وادیار بوو کە خەریکی خۆئامادەکردن بوون بۆ ڕۆژی ڕاگەیاندنی کۆمار. لە ناو شاری بە پرسیار کردن چووینە شوێنی مانەوەی جەنابی حاجی بابە شێخ و لەگەڵ گەیشتنمان بە ماڵەکە بەخێرهاتن کراین و وڵاغەکانیان لێوەگرتین و ئێمەشیان بەرەو شوێنی حەوانەوە ڕێنوێنی کرد.
 
بەرەبەیانی زوو جەنابی حاجی بابە شێخ ناردی بە شوێنمانداو چووینە خزمەتی، جەنابی لە دوورەوەڕا بە دیتنی ئێمە قرچەپێ هەستا سەرپێ و بەرەوپیرمان هات و بەڕوویەکی خۆشەوە کە هیچ کات ئاوام نەدیبوو لە باوەشی گرتین و بەخێرهاتنی کردین و پاش دەمێک قسەو باس لە سەر وەزعی تورجان و خەڵکەکەی فەرموویان کە بەخێربێن و پێم باش ئێوەش لە رۆژی ڕاگەیاندنی جمهوری کوردستان دا بەشداربن وشانازی ئەوەتان هەبێ کە لە ڕۆژی هەڵهاتنی خۆری ڕزگاری کوردا حوزورتان هەبێ و تا ئەو کاتەی کۆمار پێویستی بە ئێوەبێ لێرە بمێننەوە. پاشان فەرموویان من دەبێ بچمە خزمەتی حەزرەتی پێشەوا قازی محەممەد و ئێوەش لەگەڵ سوارەکانی خۆتان كۆبكەنەوە.

لە نێو کوردانی پارچەکانی تری کوردستان و تەنانەت دەوڵەتانی دەوروبەریش وەکوو عوسمانی و شاهەنشاهییش جێگەو پیگەیەکی تایبەت و گرینگی هەبووە 

ئەوەش بەو مانایە دێت كە حاجی بابەشێخ چەندە دڵسۆزیی كۆمارەكەوە قازی محمد بووە. حاجی بابا شێخ لەو سەردەمەدا بێجگە لە ڕۆژهەڵاتی کوردستان، لە نێو کوردانی پارچەکانی تری کوردستان و تەنانەت دەوڵەتانی دەوروبەریش وەکوو عوسمانی و شاهەنشاهییش جێگەو پیگەیەکی تایبەت و گرینگی هەبووە . بە مەودایەکی زۆر پێش دامەزرانی کۆماری کوردستان محەممەد ئاغای وسووق بابی شەهید دوکتور قاسملوو بە ماڵ و منداڵەوە ئاوارەو پەڕیوەی ناوچەی بۆکان دەبن و لە گوندی  حەساری نیزیک بۆکان نیشتەجێ دەبن ومحەممەد ئاغا ئەو سەردەمەش کەسێکی دەوڵەمەند و زیرەک و شارەزا لە کاری بازرگانی و هەروەها کەسایەتییەکی کوردپەروەرو یارمەتیدەرێکی بێ وێنەی هەژاران و لێقەوماوان بووە. 
محەممەد ئاغا رۆژیک بە حاجی بابا شێخ دەڵێت:  ئەتۆ لە بواری ماڵی دنیاوە زۆر فەقیری و کەسایەتییەکی زۆر گەورەشی لە ناو خەڵکدا، هەر شتێکت پێویست بێ لە خزمەتت دام. حاجی بابا شێخ لە وڵامدا پێی دەڵێت: خودا تۆم لێ نەستێنێ، ئەمن دەروێش مەسڵەکم و قانعم، ئیشەڵا موحتاجی دەستی کەس نابم. ئەوەش بەو مانایە دێت كە حاجی بابەشێخ ئەگەر بیویستایە دەیتوانی پێگەكەی –سەرۆك وەزیران- بۆ بەرژەوەندی خۆی بەكاربهێنێت، چوون لە كەسێكی كوردپەروەر پارەی وەرنەگرتووە، چ جای بگات بەوەی پەنا بۆ خیانەت و خۆفرۆشی ببات ،كە ئەوە زۆر دوورە لە ڕاستییەوە.

ئەمن دەروێش مەسڵەکم و قانعم، ئیشەڵا موحتاجی دەستی کەس نابم

حاجی بابا شێخ بۆ دامرکانەوەی شەڕی دوو تایەفە دەچێتە و ئاشتکردنەوەیان دەچێتە لای ڕەزا شا لە تاران و ماوەی ٤٠ ڕۆژ دەمێنێتەوە و ئەو سوڵح و ئاشتییە چارەسەر دەکات و بە ڕەزا شا دەڵێت:  تۆ دەبێ دەستوور بدەی کە کەس ئێعدام نەکرێ، چونکە ئەگەر ئێعدامیان بکەی، دوایە شەڕی دوو تایەفەگەری ساز دەبێ و وڵاتەکەم وێران دەبێ. حاجی میرزا عەزیزی تورجان لەو سەفەرەدا کە لەگەڵ جەنابی حاجی بابا شێخ دەبێ، ڕۆژێک بە حاجی بابا شێخ دەڵێ خۆ قرانێکمان پێنەماوەو بەچی بڕۆینەوە؟ لە وڵامدا حاجی بابا شێخ دەفەرمێ کە غەمی ئەوە مەخۆ، ئەمن دۆستی زۆر چاکم هەیە، لەو کاتەدا سەرگوردێک لە لایەن ڕەزا شاوە دەچێتە ئەو کاروانسەرایەی کە حاجی بابا شێخی لێدەبێ و بە خاوەن کاروانسەراکە دەڵێت:  ئەعلاحەزرەت واتا ڕەزاشا فەرموویەتی ئەوەی خەرجی حاجی بابا شێخ و میوانەکانی بووە لێرە، هەمووی بەرعۆدەی من و لە لایەن دەرباری ڕەزاشاوە حیساب دەکرێ. حاجی بابا شێخ کە بەوە دەزانێ، قوبووڵی ناکا و دەڵێت: کە من چاکەو پیاوەتیم لە ریگای خەڵکەوە کردووە، بچم بەبڕیک ئاو و گۆشت و پووڵ و پارەی ڕەزاشا بیگۆڕمەوە، قەت کاری وانکەم و بە خاوەن کاروانسەراکە دەڵێت، خەرج و مخاریجی خۆم، بۆخۆم دەیدەم و بەو سەرگوردە بڵێ:  شێخ خەرجی خۆی داوە. لەو کاتەدا حاجی بابا شێخ کاغەزێک دەنووسێ بۆ شاو سوپاسی دەكات و هەڵوێستەكەی بەرز دەنرخێنێت و پێی ڕادەگەیەنێت كە قبوڵی ئەو زەحمەتەی نەكردووە.

دەسەڵاتی شاهەنشاهیش بۆ ئەوەی دۆخەكە ئاڵۆزتر نەكات بێدەنگی لەبارەی ئەوانەوە هەڵبژارد

دوای 11 مانگ یان 330 ڕۆژ لە تەمەنى پڕ شكۆی كۆمار و بڕینی چەندین هەوراز و نشێو لەسەر ئەو دۆخەی بەسەریدا تێپەڕی، كۆتایی پێ هات. ئەوەش دوای ئەوەی لە (17ى كانوونی یەكەمی 1946) شاری مەهابادى پایتەخت لەلایەن سوپای پێنجی خۆرئاوای دەوڵەتی پادشایەتی ئێرانەوە داگیر كرا و پێشەوا قازی محەمەد و چەندین كاربەدەستی پایەبڵندی كۆماریش دەستگیر كران،  حاجی بابەشێخ، لە سەروبەرندی روخانی كۆماردا لە زیندانی تەورێز دەمێنێتەوەو پاشان وەك هەموو كاربەدەستەكانی تری كۆمار چوونەوە سەر كاری خۆیان و دەسەڵاتی شاهەنشاهیش بۆ ئەوەی دۆخەكە ئاڵۆزتر نەكات بێدەنگی لەبارەی ئەوانەوە هەڵبژارد كە لە ئێران مانەوەو تا لە ساڵی 1954 كۆچی دوایی دەكات و لە گوندی تورجان بەخاك دەسپێردرێت.
سه‌ید کامیل ئیمامی كە نازناوی شیعری (ئاوات)ە و هاوڕێ و هاوخەباتی حاجی بابە شێخ بووە بۆ مردنەكەی شیعرێكی نوسیوە كە لە دیوانەكەیدا بە شیعری   ژمارە ٨٤ دانراوە  بەم شێوەیە هەستی خۆی دەربڕیوە:
مەرگی حاجی بابە شێخ

هەر بە ناسۆرە هەمیشە ئێشی حاجی بابەشێخ
قوڕ دەپێون پاکی قەوم و خوێشی حاجی بابەشێخ
ئێشی زۆرە ئێشی دووری، ئەرخەیانم پێی دەچن
قەوم و خوێش و سۆفی و دەروێشی حاجی بابەشێخ
ئەو شەوی وا ئەو بەجێی هێشتین بە دەستی خەم، وەلێ
هاتنە پێشواز و کەوتنە پێشی حاجی بابەشێخ
وا فەلەک ناڵێ و مەلەک فرمێسکی سووری داڕژاند،
عەرز ودار و بەردیش ئاخ هەڵکێشی حاجی بابەشێخ
قوڕ بپێون هەروەکوو 'کامیل' لەقیس پاکوو چووە
فکر و تەدبیر و سەلاح ئەندێشی حاجی بابەشێخ

          (قاقڵاوا، ١٣٣٨ ی هەتاوی)