11:06 - 29/01/2021
کیژانی گلاریس لە چاوەڕوانی دادگایکردندان
بە جلە کوردییە جوانەکانیان و ژەنین و گۆرانیی چڕینە
سەرنجڕاکێشەکانیان نەک تەنها لەناو کوردانی رۆژهەڵات و ئێرانییەکان
ناوبانگیان دەرکردووە، بەڵكو لەدەرەوەی ئەم وڵاتەش ناسراون. وەک هەڵوێستێک
بۆ هێرشکردنە سەر کوردانی رۆژئاوا، بانگهێشتی کەناڵێکی بەناوبانگی تورکیایان
رەتکردەوە و لە باشوری کوردستانیش بەرنامە و کۆنسێرتی موزیک و گۆرانی گوتنیان
هەبووە. کیژە کوردەکانی کرماشان و گروپەکەیان لەلایەن دەسەڵاتی ئێرانەوە بە
"نەریت شکێن" تۆمەتبارکراون و لە چاوەڕوانی دادگایکردن دان.
گلاریس بە نەریت شكێن تۆمەتبار دەکرێت
هەوڵەکانی گرووپی ژنانی گلاریس لە کرماشان
تایبەتە بە بەرەوەپێشبردنی موزیکی کوردی و لە کۆنسێرتە سەرەکییەکانیاندا بە
جلوبەرگی کوردەواریەوە دێنە سەر شانۆ.
رۆژی 16/1/2021، لە سەرەتادا دوو ئەندامی گرووپەکە لەلایەن هێزە ئەمنیەکانەوە
ئاگادارکرانەوە و پاش لێکۆڵینەوە بە بارمتەی یاسایی ئازادکران. پاشان، هەندێک لە
ئەندامانی دیکەی گرووپەکە وەک لە هەواڵەکاندا باسکرا، بە "نەریت شكێن"
ناوبراون و لێکۆڵینەوەیان لەگەڵدا کرا.
گرووپی گلاریس بانهگێشتی کەناڵی تەرەتەی
تورکیایان رەتکردەوە وەک هەڵوێستێک بۆسەر کوردانی رۆژئاوا
رێکخراوی مافی مرۆڤی هەنگاو لە راپۆرتێکیدا ئاماژەی بەم
دەستگیرکردنانەدا و لە راپۆرتەکەدا هاتووە "دوو گۆرانیبێژی گرووپەکە
بەناوەکانی نازەنین ئاتابکی ونەسرین یەزدانی پور بە تۆمەتی "بەرێوەبردنی
مەراسیمی نەریت شکێنانە" لەلایەن پۆلیسەوە ئاگادار کراونەتەوە و
دەستگیرکراون، پاشان بە بارمتەی یاسای ئازادکراون."
لەراپۆرتەکەی هەنگاودا هاتووە، ئەندامانی دیکەی گرووپەکەش
سەبارەت بە "نەریت شکێنی" لەلایەن پۆلیسەوە ئاگادارکراونەتەوە و
نوسراویان پێ واژۆکراوە.
گرووپی گلاریس و موزیکی رەسەنی کوردی
گرووپی کچانی گلاریس لە چەند کچە هونەرمەندێکی خەڵکی کرماشان لە
ڕۆژهەڵاتی کوردستان پێکهاتووە، زیاتر لە ١٠ ساڵە دامەزراوە، جگە لە سازکردنی
کۆنسێرت لە رۆژهەڵات و ناوچەکانی تر لە چەندین فێستیڤاڵی هونەرییدا بەشدارییان
کردووە، گۆرانییەکانیان زۆرتر فۆلکلۆری ناوچەی کرماشان.. جوانی کارەکانیان و
گرنگیدانیان بە موزیکی سونەتی کوردی، شێوازی هەڵبژاردنی گۆرانییە بەناوبانگەکان و
گەنجێتی ئەندامەکانی گرووپەکە وایکرد بە خێرای ، نەک تەنها لەناو کوردانی
رۆژهەڵاتدا، بەڵکو لە سەرتاسەری ئێران و دەرەوەش بەناوبانگ بن. یەکێک لە کەناڵە
بەناوبانگەکانی تورکیا داوای لێکردن لەبەرنامەیەکی کەناڵەکەدا بەشداری بکەن، بەڵام
لەوکاتەدا تورکیا هێرشی کردبووە سەر کوردانی رۆژئاوا و ئەمەش وایکرد، کەیهانی
کەلهوڕ و گرووپی گلاریس بۆ پشتگیری لە کوردانی خۆرئاوا داواکاری کەناڵە تورکییەکە
رەتبکەنەوە.
گرووپی گلاریس لە سلێمانی و باشوری کوردستانیش
بەرنامە و کۆنسێرتیان پێشکەشکردووە و لەلایەن کەناڵە کوردییەکانی باشورەوە
بانگهێشت کراون.
گلاریس پێکهاتووە لە نۆ ژەنیار و
گۆرانیبێژ بەناوەکانی " ئیلهام یەدزانی پور، سارا گوڵمورادی، سەمیرا
فەرەحناکی، عاتیفە هلشی، فاتیمە جەلیل نەژاد، فاتیمە کەرەم جانی، مەرجان
فەرەحناکی، مەلیحە مورادی و نازەنین ئاتابکی.
رێکخراوی مافی مرۆڤی هەنگاو رایگەیاند، پارساڵ،
مەرجان فەرەحناکی لەلایەن دامەزراوە ئەمنییەکانەوە قەدەغەی چالاکی و کارکردنی
بەسەردا دراوە، ئەم گرووپە لە ئێستادا بە پێنج بۆ شەش کەسەوە بەردەوامن لە کار و
چالاکییەکانیان.
تاوەکو گرووپەکە هێندە بەناوبانگ نەبوو بوون، هێزە
ئەمنییەکان هێندە فشاریان نەدەخستنەسەر و تەنگیان پێهەڵندەچنین.
گلاریس لە چاوەڕوانی دادگایکردندا
خالێکی گرنگ لە تەنگپێهەڵچنینەکانی کار و
چالاکی ژنانی کورد لە ئێران ئەوەیە، مەزهەبی زاڵ لە ئێراندا مەزهەبی شیعەیە و
گۆرانی گوتنی ژنان بە توندی و هەستیاری و لەژێر چەپۆکی یاساکانی کۆماری ئیسلامیدا
مامەڵەی لەگەڵدا دەکرێت.
پێشتریش گرووپی "ماه بانو" بەسەرپەرشتی مەجیدی
درەخشنای رووبەرووی هەمان رێگری یاسایی بوونەتەوە. لە ساڵی 2016دا، پۆلیسی ئێران
سکاڵای لەسەر درەخشانی و گرووپەکەی بە تۆمەتی گۆرانی گوتنی ژنان لە ناو گرووپەکەدا
تۆمارکرد، بەڵام دادگا سکاڵاکەی رەتکردەوە و لەبەرژەوەندی گرووپەکە بڕیاریدا.
ئەگەر دەستواردانی لایەنە سیاسییەکان لە دادگا نەبێت و
هەنگاوەکانی ئەم سکاڵایە لەسەر گلاریس بە وردی بەرەوپێشەوە بچن، چاوەڕوان دەکرێت
سکاڵا و تۆمەتەکانی سەر ئەم گرووپەش وەک گرووپی "ماه بانو" رەتبکرێتەوە
و تۆمەتی نەریتشکێنیان بەسەردا ساغ نەبێتەوە.