11:54 - 30/01/2021

حوسێن عەلیزادە... هونەرمەندە ئازەرییەكەی ئێران چۆن باس لەمۆسیقای كوردی و هونەرمەندانی كورد دەكات؟‌

ئومێد نه‌جم

یەكێكە لە بەناوبانگترین میوزیسیانەكانی ئێران و لە رۆژهەڵاتی كوردستان ناسراوە، لە باشووری كوردستانیش بە پارچە میوزیكی نەینەوا دەناسرێت، كە ئەو میوزیكە زۆر جێگەی خۆی لەنێو خەڵكدا كردووەتەوە بەهۆی ئەو مەینەتیانەی بەسەر گەلی كورددا هاتووە. 

حوسێن عەلیزادە كە هەتا ئێستا سێ ‌خەڵاتی "گرمی" كە هاوسەنگە بە خەڵاتی ئودۆسكار لەبواری بەرهەمهێنان و دروستكردنی موزیك وەرگرتووە.  میوزیكی بۆ سێ فیلمی كوردیی بەهمەنی قوبادی داناوە.بۆ ئەوەی ئاوازێكی یەك دەقیقەی دابنێت، 200 سەعات مۆسیقای كوردی گوێ لێگرت،لەڕێی دانانی موزیكەوە خۆی خزاندۆتەوە ناو یادەوەری بینەری كوردەوە. فەتانە وەلیدی بە " قمرالملوكی كوردستان" ناوزەد كردووە. كە قەمەر ملوك بەناوبانگترین ژنە گۆرانیێژی ئێرانە.

ئەو هونەرمەندە ئێرانیە دەڵێ: "هەمیشە من خەم لەوە دەخۆم كە ئەو گەلانەی كە مەودای نێوانیان ئەوەندە نزیكە بۆ دڵیان ئەوەندە لێكدوورە. ئەو موزیكژەنە دیارەی ئێران پێشی وایە " خەڵك دڵیان لەیەك دوور نییە، ئەوە سنوورە سیاسییەكانە ئەو دوورخستنەوەیەی دروستكردووە".

حوسێن عەلی زادە كێ یە؟ و چۆن دەڕوانێتە موزیكی كوردی؟
حوسەین عەلیزادەلەساڵی 1952 لە گەڕەكێكی تارانی پایتەختی ئێران لەدایكبوە، ئاوازدانەر، لێكۆڵەر، ژەنیاری سازی تار و سێتار،  بە رەچەڵەك لەدایكبوی خێزانێكی ئازەری یە، باوكیخەڵكیشاریورمێودایكیخەڵكیشاریئەراكبوو.دەرچووی كولێژی هونەرە جوانەكانی زانكۆی تارانە، وەك مۆسیقاژەنێك كاری لەگەڵ زۆربەی هونەرمەندە ناودارەكانی ئێران كردووە. یەكێكە لە ناسراوترین میوزیكژەنانی رۆژهەڵاتی ناوەڕاست و تائێستا سێ جار كاندید بووە بۆ وەرگرتنی خەڵاتی گرامی.جگە لە ئێران چەندین ئاهەنگ و كۆنسێرتی لەوڵاتانی جیهانی ساز كردووە، چەند ساڵێك بەر ئێستا لەگەڵ هونەرمەند شەجەریان هاتنە كوردستان و لەشاری سلێمانی كۆنسێرتێكی ئەنجامدا.حوسێن عەلیزادە كاری هاوبەشی مۆسیقایی لەگەڵ چەندین هونەرمەندی كورد كردوە، لەوانە شەهرامی نازری و كەیهان كەلهور و كامكاران.

"عاشقی میوزیكی كوردی و گەلی كوردم"
حوسێن عەلیزادە كە لەئێراندا بە مامۆستای سازی تار و بە نوێكەرەوەی قوتابخانەی تار دادەنرێ، هاوشانی محەمەدرەزا لوتفی تاژەنی بەناوبانگی مۆسیقای سونەتی ئێرانی، وەها لەسەر موزیكی كوردی دەدوێ : "میوزیكی كوردی زەریایەكە كە ئەگەر بڵێم بەباشی دەیناسم ئەوە زێدەڕۆییم كردووە، بەڵام من لەو كەسانەم عاشقی میوزیكی كوردی و گەلی كوردم. دۆست و هاوڕێی كوردم زۆرن لە شوێنە جیاجیاكانی كوردستانی ئێران، هەر لەسەرەتای لاوێتیمەوە لەگەڵ فەرهەنگی كورد ئاشنابووم، مۆسیقای كوردی ئەوەندە پڕبارە، زۆربەی نەوەكانی ئەم سەردەمە تێناگەن كە چ سامانێكی گەورەیان هەیە.ئەو میوزیكەی كە ئاشنام لەگەڵیدا و رۆژ بە رۆژیش زیاتر هەوڵدەدەم بیناسم و میوزیكناسە جیهانییەكانیش لەگەڵیدا ئاشنا دەبن، زەریایەكە كە كۆتایی نایەت.

حیكایەتی ئاشنابونی بە مۆسیقای كوردی و ناسینی هونەرمەندانی كورد:

  "باوكم عاشقی دەنگی حەسەن زیرەك بوو"
لە ناوە دیارەكانی مۆسیقای كوردی كە بەلایەوە پەسەند و دەنگیانی پێ خۆشە، ئەو هونەرمەندە ناوی سەید عەلی ئەسغەری كوردستانی دەهێنێ. "كاتێ من زۆر تەمەن بچووك و هێشتا منداڵ بووم بە ناوی حەسەن زیرەك و یەك دوو كەسی تر كە ئێستا لەیادم نەماوە ئاشنا بووم و هەندێك گوێم لێیان دەگرت.  

زەمانی منداڵی،  لە ئورمیە بو، ساڵەهای ساڵە لەشارێكی وەكو ورمێ دا كورد و ئازەری بەیەكەوە ژیاندەكەن و لەڕووی فەرهەنگی و كلتورییەوە لەیەكەوە نزیكن، ئەو لەماڵێكدا گەورەبو گوێی لەموزیكی كوردی و فارسی ئازەری دەگرت.باوكی عاشقی دەنگ و سەدای حەسەن زیرەك بوو، جگە لەوەش سەفەریان بۆ شارە كوردنشینەكانی وەك مەهاباد و دەوروبەر دەكرد.لەو كاتەوە مۆسیقای كوردی ناسی و ئاشنا بو بە ئاواز و میلۆدی كوردی.بەڵام یەكەمین هۆكاری ئاشنایی ئەو بە مۆسیقای كوردی بە شێوەیەكی جدی گروپی كامكاران بوو.

عەلیزداە میوزیكژەن و ئاوازدانەری بەناوبانگی ئێران دەڵێ:  "ئوستاد حەسەن كامكار بە ناونیشانی مامۆستایەكی گەورەی مۆسیقای كوردی دەناسم. بە هەمان شێوە كوڕەكانی كە لە گروپی (شەیدا) و (عارف)  چالاك بوون، لەو كەسانە بوون كە دۆستی ئێمە بوون.  دێتەوە یاد پێش شۆڕشی ئیسلامی (ئینقلاب) بە كارەكانی ئوستاد كامكار ئاشنا بووم، چون گروپی شەیدا پێشتر لە رادیۆ چالاكی و بەرهەمیان هەبوو.  لەوانەیە (ڕەنگبێ) خانەوادەی كامكار وێنەكانی ئەو ڕۆژگارەیان لە ئەرشیفیدا مابێت. لەوكاتە لەنزیكەوە بە مۆسیقای كوردی ئاشنا بووم. ڕۆژی ئاهەنگی هاوسەرگیری بیژن كامكارم بەباشی لەیاد ماوە، كاتێ تەواوی ماوەی ئاهەنگەكە گۆرانی مۆسیقای شادی كوردی بوو.

" ڕیشەی مەقامی كوردی زۆر لە مەقام و دەستگای ئێرانی كۆنترە"
"كاتێك هۆرەی ناوچەی كرماشان دەبیستم، دەچمە قووڵایی مێژووەوە"
"چەند جوانە دایكانی كورد بەشێوازی جۆراوجۆر میلۆدییان بۆ لایە لایە دروستكردووە"
بە وتەیحوسێن عەلیزادە"مۆسیقای ئێرانی سوودێكی زۆری لە مۆسیقای كوردی وەرگرتووە".  ئەو هونەرمەندە پێی وایە "ڕیشەی مەقامی كوردی زۆر لە مەقام و دەستگای ئێرانی كۆنترە".

سەرسامی خۆی دەردەبرێت بە موزیكی كوردی و دەڵێ: "مۆسیقای كوردستان تەنیا ئەو میوزیكە بەزمی و ریتمیكە نییە كە قووڵایی میوزیكەكەیتێدا نەبینرێت، دەتوانی میوزیكی حەماسی و كۆن لە مۆسیقای كوردیدا ببینیتەوە كە دەگەڕێتەوە بۆ پێش ئیسلام، كاتێك هۆرەی ناوچەی كرماشان دەبیستم، دەچمە قووڵایی مێژووەوە، ئەوەندە كاریگەری لەسەر من هەبووە، تەنانەت كاتێكیش میوزیك بۆ ئەو فیلمانەی كە هیچ پەیوەندییەكی بە كوردەوە نەبووە دروستدەكەم، ئیلهام لە میوزیكی كوردی وەردەگرم. كاتێك بەدوای لایە لایە دەڕۆم كە لەكارێكمدا بوو، دیسان گەیشتمە زەریایەك كە چەند جوان دایكانی كورد بەشێوازی جۆراوجۆر میلۆدییان بۆ لایە لایە دروستكردووە.كاتێك دەچوومە ئاهەنگ و جێژنەكانی كورد، دیسان دەمبینی چەندە میوزیكێكی پڕباریان هەیە. میوزیكی ئاینیی كورد هەروا، من بەپێی پێویستی خۆم كە لەگەڵ هونەرمەندانی كورد ئاشنا بووم، وردە وردە هەستم بە نزیكی لەگەڵ ئەو میوزیكە كرد، دواتر لەبەر ئەو پرسانەی كارم تێدا كردوون، زیاتر ناچاربووم بچمە قووڵایی میوزیكی كوردی.

"مۆسیقای كوردی ئیلهامبەخشی كارەكانم بووە"
لە میلۆدی كوردی كەڵكی وەرگرتوە
حوسێن عەلیزادە دەڵێ : "زۆركات هەبوو لە پارچە میوزیكەكانی خۆمدا لە میلۆدی كوردی كەڵكم وەرگرتووە بۆ نموونە 34 ساڵ پێش ئێستا لە ئەلبوومی تۆركەمەن لە بەشێكیدا لە گۆرانی ئەسمەر ئەسمەری كوردی كەڵكم وەرگرتووە".لە میوزیكی فیلمەكاندا زۆرتریش پێی خۆش بووە كەڵك لە دەنگی ژن وەرگرم  وەكو بەشداری خانم هەدیە تارانی لەفیلمی نیوە مانگدا ، هەروەها 18 ساڵ پێش ئێستا لە زنجیرە كۆنسێرتێكدا لە دەرەوەی وڵات و لە فرانكفۆرتی ئەڵمانیا سێ فەرهەنگی مازەندەران و كوردستان و قەشقایی پێكەوە گرێدا. بەو كارانەی كردوومە هەوڵیداوە وەك میوزیكدانەرێكی ئێرانی بناسرێ نەك فارس. پێشی وایە مۆسیقای كوردی وەك دەریا وایە،نەوەی نوێ قەدری ئەم سامانە مۆسیقاییە دەوڵەمەندە نازانن. دان بەوەدا دەنێ میوزیكی كوردی دەرگایەكی بۆ من كردەوە كە فەرهەنگەكانی دیكەش بناسێ.

هونەرمەندێكی كورد فێری ژەنینی تەمبوری كرد
حوسێن عەلیزادە پێش میوزیكی فیلمەكان، پێشتر كاری لەگەڵ شەهرام نازری و كەیهان كەلهور كردووە، هەروەها دۆستایەتی نزیكیشی لەگەڵ كامكارەكان هەبووە، ئەگەرچی بەشێوەی تایبەتی كاریان پێكەوە نەكردووە، بەڵام زۆر بەیەكەوە ژیاون لە  گروپی مۆسیقای(چاوۆش) كە بەشێكی زۆر لە ئەندامانی ئەو گرووپە كورد بوون.
یەكەم جاریش كە بە سازی تەمبور ئاشنا بوو و فێری ژەنینی ئەو ئامێرە مۆسیقاییە بو بەهۆی هونەرمەندی دیاری كورد لەئێران عەلی ئەكبەر موڕادی یەوە بوە، كە دواتر لە بەرهەمەكانیدا سودی لەم سازە ڕەسەنە كوردییە وەرگرتوە.

مۆسیقای بۆ فیلمی كوردی دانا
حسین عەلیزادە  جگە لەوەی موزیكژەنە و ئاوازدانەریشە، بەتایبەت كاری بۆ دانانی موزیكی فیلم كردووە، لە موزیكی فیلمیشدا دەستێكی باڵای هەیە،مۆسیقای بۆ چەندین فیلمی ئێرانی داناوە، چوارجار خەڵاتی باشترین موزیكی فیلمی لەئێراندا وەرگرتوە، بەڵام لەناو هەموو كارەكانیدا مۆسیقای فیلمی "نیو مانگ"ی بەلاوە جوانە.
كە مۆسیقای بۆفیلمەكانی سینەماكاری جیهانی بەهمەنی قوبادی داناوە. لەڕێی دانانی موزیكەوە بۆ فیلمەكانی(كیسەڵەكان دەفڕن ، ساتێك بۆ مەستیی ئەسپەكان، نیوە مانگ) خۆی خزاندۆتەوە ناو یادەوەری بینەری كوردەوە.

بۆ ئەوەی ئاوازێكی یەك دەقیقەی دابنێت، 200 سەعات مۆسیقای كوردی گوێ لێگرت
كاتێك بەهمەن قوبادی بۆ میوزیكی فیلمێك قسە لەگەڵ  عەلیزادە دەكات و پێشنیازی میوزیكی یەكەمین فیلمی خۆی بۆدەكات،  ئەو هونەرمەندە لێی دەپرسی دڵنیای ئەو پێشنیازە بەمن دەكەی؟ چونكە من كورد نیم. 

ئەو هونەرمەندە لەوبارەیەوە دەڵێ: "كاتێ پێشنیاری دانانی مۆسیقایان بۆ فیلمی كوردی خستە بەردەمم، ڕاستییەكەی لەسەرەتاوە كەمێك ترس دایگرتم، كە من نابێ پا بكەمە ناو حەوزێكەوە كە مەلە نازانم، چون زۆر تێكەڵی فەرهەنگی كوردی نەبوومە، ئەڵبەتە تاڕادەیەك ئاگام لێیەتی بەڵام دوورم".
ئەگەرچی بوێری و پشتبەستنی قوبادی بە من جیهانێكی نوێی بەڕووی مندا كردەوە.دوای ئەوە بوو كە من زیاتر چوومە نێو موسیقای كوردستان و لەبیرمە بۆ بەشێكی زۆر بچووك لە پارچە میوزیكی فیلمەكە زیاتر لە 200 سەعات گوێم لە میوزیكی كوردی گرت. كردمە دەستمایەی كارەكەم و ئەو میوزیكەم دروستكرد كە لە فیلمی (كیسەڵەكانیش دەفڕن) گوێتان لێبوە یا ئەو موزیكەی لەفیلمی نیوە مانگدا بەر گوێتان كەوتوە.

ئەو فیلمانە كوردییانەی عەلیزادە موزیكی بۆ داناوە:
ساتێك بۆ مەستیی ئەسپەكان

ساتێك بۆ مەستیی ئەسپەكان (بە فارسی: زمانی برای مستی اسبها) یەكەم فیلمی درێژی دەرهێنەری كورد بەهمەن قوبادییە و مۆسیقای  فیلمەكە حوسێن عەلیزادە دایناوە. بەرهەمی ساڵی ٢٠٠٠ەولەڕۆژهەڵاتیكوردستاندروستكراوە. ئەمفیلمەزۆرسەركەوتووبوووخەڵاتیزۆریوەرگرت.

كیسەڵەكانیش دەفڕن
كیسەڵەكانیش دەفڕن فیلمێكە بە زمانی كوردی لە دەرهێنانی دەرهێنەری كورد بەهمەن قوبادی. كاری مۆسیقای لە لایەن حوسێن عەلیزادە بۆ كراوە و لە ناو ١٠٠فیلمیتردابۆئۆسكاریساڵی٢٠٠٥هەڵبژێردرا. ماوەیفیلمەكە٩٥خولەكەویەكەمفیلمیسینەماییعێراقەلەدوایڕووخانیدەستەڵاتیسەدامحوسەین.

نیوەمانگ
نیوەمانگ فیلمێكی درێژی دەرهێنەری كورد بەهمەن قوبادییە و سێیەمین فیلمی كوردییە كە حوسێن عەلیزادە مۆسیقای بۆ داناوە. فیلمەكە لە ئێران و عێراق و نەمسا دروستكراوە و بەرهەمی ساڵی ٢٠٠٦ە. 

موزیكی بۆ كیمیابارانی هەڵەبجە دانا
تەنانەت دەرهێنەری ئێرانی بەڕەگەز كورد ئیبراهیم سەعیدی كە لەسەر دۆكیۆمێنتارییەك لەبارەی تاوانەكانی سەدامەوە لەبەرامبەر كورد لەكیمیابارانی هەڵەبجەكاری دەكرد، كاتێك دۆكیۆمێنتارییەكە تەواو كرا،  پەیوەندی بە حوسێن عەلیزادەوە كرد بۆ ئەوەی  بۆ میوزیكی كۆتایی دۆكیۆمێنتارییەكە پارچە میوزیكێكی كوردی دابنێت، ئەویش بیر لەوە لەوە دەكردەوە كە چ پارچە میوزیكێكی كوردی دابنێو دەیویست شتێك بێت كە پێشتر نەكرابێت و نەبیسترابێت، وەك خۆی لە چاوپێكەوتنێكدا دەڵێ "ئەوكاتە رێگەم بەخۆمدا كاتێك شیعری كوردییان بەمن دا، من لەسەر پارچە میوزیكێك دایبنێم. ئەوكاتە بوو زانیم كە ئەگەر بە ئیمان و باوەڕ و هەستەوە سەیری فەرهەنگێكی دیكە بكەی، ئەو فەرهەنگە دەڕژێتە ناو تۆ، بۆیە ئەو پارچە میوزیكەم بۆ ئەو دۆكیۆمێنتارییە دروستكرد و ئێستاش هەركەس دەیبیستێ، بڕواناكات كاری كەسێكە كە كورد نییە".

لەكوردستان بە ئەلبومی نەی نەوا ناسراوە
لە كارە بەنێوبانگەكانی عەلیزادە، ئەلبوومی نەی نەوایە كە لە كوردستاندا زیاتر ناسراوە و لە بۆنە و مەراسیمە ماتەمینییەكاندا لێدەدرێت. كە نەی ژەنی ئەم پارچە مۆسیقایە خۆشی كوردە، ئەویش هونەرمەند جەمشید عەندەلیبی یە. ئەوەی لە عەلیزادە كرد لەناو هەموو موزیكژەنەی ئێران ئەو موزیكژەنە كوردە هەڵبێژێ توانای عەندەلیبی یە و هەروەها خۆشەویستی زۆری بۆ كاری هونەریەكەو نزیكی لە عەلیزادەوە.

لەبارەی ئەوەی چۆن بو جەمشید عەندەلیبی هەڵبژێردرا بۆ ئەوەی ببێتە ژەنیاری نەی لە نەینەوا؟
حوسێن عەلیزادە دەڵێ:"ئەوكاتەی كە لە (چاوۆش) بووین، ئەندامانی گرووپەكە زۆربەیان یان قوتابی من بوون یان محەممەد رەزا لوتفی. كاتێك پەیمانگای هونەریان داخست، ئەوان دەهاتن بۆ لای ئێمە و لەوێ درێژەیان بە فێربوونی هونەر و میوزیك دەدا. بۆ نەینەوا دەبووایە لەنێوان دوو ژەنیاری نەی، جەمشید عەندەلیبی و بێهروز ئەفشارنیا یەكێكیان هەڵبژێرم، جەمشید عەندەلیبی توانایەكی زۆر باشی هەبوو بۆ فێربوون، هەروەها خۆشەویستییەكی زۆری بۆ كارەكە نیشاندا و دەیتوانی ئەوكارە ببێتە هۆی پێگەیاندنی زیاتری، هەروەها ئەوم لێ نزیك بوو، لەبەردەستمدا بوو، هەر نۆتێكم كە بۆی زیاد دەكرد هەر ئەوكات لەگەڵ عەندەلیبی كارم دەكرد، نۆت بە نۆت كە پارچە میوزیكەكەمان دەنووسی ئەویش كاری لەگەڵ دەكرد، هەر ئەوەش هۆكار بوو بۆ ئەوەی كە بە چەند رۆژێكی كەم تۆمار كرا. دواتر كە نەینەوا لە ئێران و جیهانیش وەك كۆنسێرت پێشكەش كرا.

ئەو هونەرمەندە دەڵێت ئارەزوومە لێرەش بۆ هۆگرانی ئەو پارچە میوزیكەكۆنسێرتێك لە باشووری كوردستان پیشكەش بكات. 
حوسێن عەلیزادە پێیوایە پێشكەشكردنی نەینەوا لێرە هەستێكی زۆر جوانی دەبێت، لەبەر ئەوەی ئەو مەودایەی نێوانمان هەم لەلایەنی هەست و سۆز و دڵەوە و هەمیش لە مەودای نێوان ئێران و كوردستان ئەوەندە نزیكە كە بە ئاسانی دەكرێت. ئەو هونەرمەندە دەڵێ: "هەمیشە من خەم لەوە دەخۆم كە ئەو گەلانەی كە مەودای نێوانیان ئەوەندە نزیكە بۆ دڵیان ئەوەندە لێكدوورە، من پێموایە خەڵك دڵیان لەیەك دوور نییە، ئەوە سنوورە سیاسییەكانە ئەو دوورخستنەوەیەی دروستكردووە، هۆكارێكی دیكەش ئەو رۆژئاوایی بوونەوەیە كە ئەوەندە چاومان لە رۆژئاوایە ئەوەندە چاومان لە دراوسێكانی خۆمان نییە". 

حوسێن عەلیزادە: "فەتانەی وەلیدی قەمەر ملوكی كوردستانە"
حوسێن عەلیزادە چەند ساڵێك لەمەوبەر هاوكات لەگەڵ بەڕێوەچوونی كۆنسێرتی حوسێن عەلیزادە لەشاری سنە، سەردانی هونەرمەندی دێرین و دیاری كوردستان، خاتوو فەتانە وەلیدی كرد.
حوسێن عەلیزادە كە هەتا ئێستا سێ‌خەڵاتی "گرمی" كە هاوسەنگە بە خەڵاتی ئودۆسكار لەبواری بەرهەمهێنان و دروستكردنی موزیك وەرگرتووە، فەتانە وەلیدی بە " قمرالملوكی كوردستان" ناوزەد كردووە.
فەتانە وەلیدیكە بە وتنی گورانی "سەبری گوڵ فرۆش" ناوبانگێكی تایبەتی دەركرد و بە یەكێك لە هونەرمەندە بەناوبانگەكانی كوردستان دێتە ئەژمار. ئێستا تووشی نەخۆشی دەروونی هاتووە و لەگەڵ باوكی لە ئاوایی "حەسەن ئاوا"‌ی سنە ژیان بەسەر دەبات.
گۆشەی تەریكی تەنیایی و دووركەوتنەوەلەشار و ژیان لەگەڵ باوكێكی پیر لەشاردەێی حەسەن ئاوا لەسنە، بوونەتەهاودەمی یادەكانی و زۆر جار بەدەم هەنسكی گریانەوەلاپەڕەی بیرەوەرییەكانی هەڵدەداتەوە.

حیكایەتی دیداری حوسێن عەلیزادە مامۆستای مۆسیقای ئێران لەگەڵ خانمە هونەرمەندی كوردستان فەتانەی وەلیدی كە فەرامۆش كراوە.  
كاتێك پۆستەری پێشانگای  ئەفشین فەتاحی فۆتۆگرافەری كورد دەبینی كە لەوێنەی فەتانە وەلیدی دروست كرابوو پیشانی مامۆستا حوسێن عەلیزادە دا.ئەو وێنەگرە لەدرێژەدا باسی لەوە كردووە، مامۆستا حوسێن بە بینینی وێنەی فەتانە وەلیدی هەستێكی تایبەت تێیدا دروست بوو و داوای بینینی خاتوو فەتانەی كرد.

دەستی فەتانەی وەلیدی ماچ كرد
ئەفشین فەتاحی كە ڕێنیشاندەری حوسێن عەلیزادە بۆ ماڵی فەتانە و ڕێكخەری دیداری ئەو دوو هونەرمەندە بوە، لەو بارەیەوە دەڵێ: "من هەرگیز بەبیرم دا نەدەهات كە رۆِژێ ئوستاد حوسین عەلیزادە لە نزیكەوە فەتانە ببینَێ و بەدیداری یەك شادبن، ئەوەی سەیرە تا ئەو ساتەش ئوستاد عەلیزادە هیچ ئاشنایی بەكارە هونەریەكانی فەتانەی وەلیدی نەبوو، ئەمما بەو مەبەستەی كە ئەمیش هونەرمەند بوە و پێش چل ساڵە گرفتاری نەخۆشی هاتوە و بەهۆیەوە وازی لەكاری هونەی هێناوە، عەلیزادە بەئەركی خۆی زانی كە سەردانی بكات  و دڵنەوایی بكات.

بۆ ئاشنا بونی ئوستاد بە بەرهەمەكانی  و دەنگ  وسەدای فەتانەی وەلیدی  لەناو سنەوە تاگەیشتە ماڵی فەتانە لە لەگوندەی بەتەنها دەژی چەند گۆرانیەكیان بۆی پەخشكرد. دوای گوێگرتن لەچەندین گۆرانی و نزیكبونەوە لەماڵی فەتانە لە حەسەن ئاوا، لە مامۆستا حوسێن عەلیزادەم پرسی كە بەبێ ناسینتان بۆی حەزدەكەم بۆچونت دەربارەی دەنگی فەتانە وەلیدی بڵێی.. ئوستاد دوای ساتێك بێدەنگی كە مانای ئەسەف بو بۆ سەرگوزەشتەی خەمناكی فەتانەی وەلیدی، دەنگی ئەوی بە بێ هاوتا و ئەفسانەی و  بە قەمەر ملوكی كوردستانی دانا. كە قەمەر ملوك بەناوبانگترین ژنە گۆرانێژی ئێرانە.

ئەو هونەرمەندە وێڕای بەداخ بوون بۆ باری دەروونی ئەو ، دەستی هونەرمەند فەتانە وەلیدی ماچ كرد و سەری كڕنۆشی بۆ ماندووبوون و كارە هونەرەییەكانی دانواند، ولەخۆشەویستی فەتانە، چەند پارچە مۆسیقایەكی ژەنی.

سەرچاوە:
1-https://www.bartarinha.ir/fa/news/137282/%D8%AD%D8%B3%DB%8C%D9%86-%D8%B9%D9%84%DB%8C%D8%B2%D8%A7%D8%AF%D9%87-%D8%A7%D8%B2-%D9%85%D9%88%D8%B3%DB%8C%D9%82%DB%8C-%DA%A9%D9%8F%D8%B1%D8%AF%DB%8C-%D8%A7%D9%84%D9%87%D8%A7%D9%85-%D9%85%DB%8C%E2%80%8C%DA%AF%DB%8C%D8%B1%D9%85
2- بوسه تار بر دستان تنهاترین زن: افشین فتاحی
3- چاوپێكەوتنی رووداو لەگەڵ حوسێن عەلیزادە: https://www.google.com/.../sorani/interview/05122018-amp