ڕاپۆرتی کوردستانی

10:30 - 08/04/2021

بەهۆی بۆردومانی درۆنی توركی دژ بە پەكەكە، كورد لە شاخە سجنەكاندا تۆقیوە‌

پەیسەر


ماوەی 10 رۆژی پێچو تاوەكو تەرمی موحسین سپیری دۆزرایەوە. ئەو پیاوە تەمەن 64 ساڵە شارۆچكەكەی خۆی بەجێهێشت كە لەنێو چیاكانی هەرێمی كوردستانی عێراقدا بون شانبەشانی هاوڕێكانی كە ناویان حەسەن سادق و سەفەر سینی بو، جێهێشتنەكەشیان لە كەشێكی وشك و رەشەبای سارد بو لە دیسەمبەری ساڵی رابردو كە بەمەبەستی راوەماسی و كۆكردنەوەی هەنگوینی شاخ و قارچك چونەدەر.

ژیان لە ناوچەی ئامێدی لە زنجیرە چیاكانی زاگرۆس زۆر قورسە، بەڵام هەزاران ساڵە ئەو ناوچەیە بوەتە ماڵی كورد و ئاشورییەكان هاوشان لەگەڵ بەرزی و نزمیی چیاكاندا. زۆرێك لە دانشتوانی ناوخۆی ئەو ناوچانە، خوازیارن بۆ ماوەی چەند رۆژێك كۆچ گەشت بۆ ناوچەكە بكەن و بمێننەوە لە كاتێكی دیاریكردودا، بەڵام پاش ئەوەی بنەماڵەكەی سپیری بۆ ماوەی زیاتر لە هەفتەیەك نەیانتوانی لەڕێی تەلەفۆنەوە پەیوەندی پێوە بكەن، گەڕان بەدوای ناوبراو دەستی پێكرد. 

لاشەی ئەو سێ پێشمەرگەیەیە لە دۆڵی زەری دۆزرانەوە كە پارچە پارچە كرابون بەهۆی بۆردومانی فڕۆكەی بێفڕۆكەوانی توركییەوە. سادق و سینی وا دەردەكەوتن كە راستەوخۆ گیانیان لەدەستدابێت لەكاتی بۆردومانەكە، بەڵام تەرمی سپیری نزیكەی 100 مەتر لەولاترەوە بەهۆی خوێن لێچونەكەیەوە دۆزرایەوە.

"ئەو هەوڵی دابو بگاتە یارمەتییەك، هەوڵی دابو بچێتە شوێنێك شەبەكەی موبایل هەبێت یاخود تەقە بكات بۆ ئەوەی خەڵك بێن بەهاواریەوە،" ئەمە وتەی بەختیاری تەمەن 35 ساڵی كوڕی سپیرییە لە شارۆچكەی دێرەلوك، وتیشی: "بەو شێوەیە مرد كە بۆم باس كردن، رەنگە دو بۆ سێ رۆژ بە ئازارەوە ناڵاندبێتی."

بەوتەی وەزارەتی بەرگری توركیا، 5 گەریلای پارتی كرێكارانی كوردستان (پەكەكە) لە عێراق لە صالاكی خران لە هەمان ئەو هەفتەیەی كە سێ هاوڕێی منداڵیی یەك گیانیان لەدەستدا. بەڵام هیچ لێدوانێك سەبارەت بە بۆردومانەكەی كە بوە هۆی كوژرانی هاوڵاتیی مەدەنی بەدەست نەكەوت. سەرچاوەیەكی وەزارەتی بەرگری توركیا رایگەیاند كە ئەو ئۆپەراسیۆنانە تەنها بۆ بەئامانجگرتنی تیرۆریستانە و هەمو ئامرازێكیش دەگیرێتەبەر بۆ رێگرتن لە بەئامانگرتنی هاولاتیانی مەدەنی. 

هێشتاكە سپیری و هاوڕێكانی ناوەكانیان لە لیستی قوربانیانی مەدەنیدان هاوكات لەگەڵ بەرەوپێشچونی شەڕی لەمێژینەی توركیا لەگەڵ پەكەكە لە دەرەوەی سنورەكانی خۆی. 

بەگوێرەی داتاكانی گروپی چاودێریی شەڕی ئاسمانی، لەئێستادا ئەو شەڕ و ناكۆكییان زیاتر بوەتە بەڵا بۆ هاوڵاتیانی مەدەنی زیاتر لەهەر چینێكی دیكە بەتایبەت دوای شكاندنی ئاگربەستی 2015. دانیشتوانی ئامێدی و ناوچە بەئامانجگیراوەكانی دیكە فڕۆكە بێفڕۆكەوانەكانی توركیا دەبینن كە بەبێدەنگی بەسەر لوتكەی چیاكاندا دەفڕن و ترسێكی زۆریان لێ دەنیشێت. 

توركیا و پەكەكە سەقاڵی شەڕ و ناكۆكین لەو كاتەی كە خەباتی چەكداریی راگەیاندوە لە ساڵی 1984وە. زیاتر لە 40 هەزار كەس لەو شەڕ و توندوتیژییانەدا كوژراون كە زۆرینەی هەرەزۆریان هاوڵاتیی مەدەنین و پەكەكەش وەكو رێكخراوێكی تیرۆریستی لەلایەن توركیا و هاوپەیمانەكانی رۆژئاواوە ناسێنراوە. 

هەرێمی كوردستانی عێراق (كە دەكەوێتە باكوری عێراقەوە) و ناوچەیەكی شاخاوییە، لەمێژە بوەتە مۆڵگەی سەرەكیی پەكەكە، بەڵام ناوچەكەكانی ژێر دەسەڵاتی حكومەتی هەرێمی كوردستان دابەش بون لەنێوان ئەوەی چۆن و بە چ شێوازێك مامەڵە لەگەڵ پەكەكە بكەن. پارتی دیموكراتی كوردستان كە گەورەترین هێزی سیاسییە لە ساڵانی رابردودا پەیوەندییەكی ئابوریی پتەوی لەگەڵ توركیا بنیات ناوە و رێگەی داوە بە ئەنقەرە بنكەی سەربازی لە هەرێم بنیات بنێت و ئۆپەراسیۆنەكانی پەرەپێبدات دژبە هەر چالاكییەكی پەكەكە لە ناو خاكی عێراقەوە. هەروەها هێزەكانی پارتیش ناوبەناو لەگەڵ گەریلاكانی پەكەكە روبەڕوی شەڕ و پێكدادان دەبنەوە. 

ئاگربەستی نێوان سەركردەكانی پەكەكە و حكومەتەكەی رەجەب تەیب ئەردۆغانی سەرۆكی توركیا، بەهۆی سیاسەتی ناوخۆی توركیاوە لە 2015 شكستی هێنا و بوەهۆی هەڵگیرسانی نیمچە جەنگێكی نوێ لە باشوری رۆژهەڵاتی توركیا شانبەشانی هێرشەكان لە سنورەكانی سوریاوە كە ئامانج لێیان بۆ لێدان بو لە سەركەوتنەكانی ئە هێزانەی گرێدراوی پەكەكە بون لەو ناوچانە. 

هاوكات، ئەنكەرە دەستی كردوە بە گرتنەبەری سیاسەتێكی دەرەكیی زیاتر دوژمنكارانە لە چەند ناوچەكی زۆر دورتر لە سنورەكانیەوە وەك لیبیا و سۆماڵ كە لەو رێیەوە زۆر هەڵكشاوە بەتایبەت بەهۆی كاریگەری هێرشی فڕۆكەی بێفڕۆكەوانەوە. 

خاڵی سفری ئەم دۆخە سەربازییە هێشتاكە بریتییە لە دەروازەی دواتر لە زنجیرە چیاكانی زاگرۆس لە عێراق كە تیایدا هێرشە ئاسمانییەكانی توركیا بەوردی سەركردە دیارەكانی پەكەكە دەكاتە ئامانج و لە 2020 خەڵكی زۆر زیاتری كوشتوە لەهەر كات، بەڵام خێزانەكانی هاوشێوەی بنەماڵەی سپیری دەڵێن هیچ لێپێچینەوەیەك نیە دژبەو بۆردومانانەی كە دەبنە هۆی كوژران و برینداربونی خەڵكانی مەدەنی. 

زیادبونی ئەو توندوتیژییانە بوەتە مایەی شۆك بۆ زۆرینەی خێزانەكانی نیشتەجێی ئامێدی كە زۆرێكیان پێشتریش چەند جارێك ناچار بون لە ناوچەكانیان هەڵبێن بەهۆی رژێمەكەی سەدام حسێنەوە، هەروەها بەهۆی شەڕی پەكەكە و توركیا و جگە لەوەش بەهۆی شەڕێ‌ ناوخۆی كورد لە ساڵانی هەشتا و نەوەدەكانی سەدەی رابردو. 

شاخەكان لەسەردەمی رژێمی سەدامدا  بە (ناوچەی قەدەغەكراو) ناونرابون بەتایبەت كە لەو سەردەمەدا شوێنی جێگیربونی هێزی پێشمەرگە بون. ئەمڕۆكە، هێشتا شاخەكان ناوچەی قەدەغەن بۆ ئەوانەی كە بە نیشتمانی خۆیان ناوی دەبەن.  بەپێی داتاكانی رێكخراوی (كریستیان پیسمەیكەر تیمس) نوێبونەی شەڕی نێوان پەكەكە و توركیا بوەتە هۆی چۆڵبونی نزیكەی 400 گوند و كوژرانی نزیكەی 100 هاولاتی مەدەنی. هەڵسەنگاندنە ناوخۆییەكانیش ئاماژە بەوە دەكەن كە بۆردومانی فڕۆكەی سەربازی و فڕۆكەی بێفڕۆكەوانی توركیا تاوەكو ئێستا 70%ی لوتكەی ناوچە شاخاوییەكانی گرتوەتەوە. 

زۆرێك لەو خێزانانەی ئاوارە بون هەوڵی نیشتەجێبونیان داوە لە سەنتەری ناحیەكانی وەك دێرەلوك كە تێیدا خێزانی سپیری دەژین، بەڵام هەڵاوسانی ژمارەی خەڵكی بوەتە هۆی دروستبونی چڕی دانیشتوان و قەرەباڵغییەكی زۆر و بێكاری. 

هەلی كاری سنوردار بەشێكە لەو هۆكارانەی كە بونەتە هۆی ئەوەی زۆرێك لە خەڵكی داوای گەڕانەوە بكەن بۆ ناوچە قەدەغەكراوەكان. فرۆشتنی روەكی گژوگیایی كێوی و قارچك و هەنگوین لە شاخەكان دەكرێت زۆر بە ئاسانی ببنەهۆی دابینكردنی داهات بۆ خێزانەكان. 

"ئێمە لێرە ئاوارەین، بستێك زەویمان نیە. پێویستە بە قاچاخ بگەڕێینەوە بۆ ناو دۆڵ و چیاكانمان لەبەرئەوەی فڕۆكە توركییەكان هەمو رۆژێك بۆردومانمان دەكەن و تەنانەت پەكەكەش رێگەمان پێ نادات چرایەك دابگیرسێنین یان ئاگرێك بكەینەوە." ئەمە وتەی بەختیارە. 

دەشڵێت: "لەم كاتی قەیرانی ئابورییەدا باوكم هەوڵی دا خێزانەكەمان ئامادە بكات، هەمو ئەوەی ئەمانویست بریتی بو لە ژیانكردن لەسەر خاك و زێدی خۆمان، بەڵام بەڵام ناوچەكەمان بوەتە گۆڕەپانی گەمەی سیاسی و دەسەڵات. هەریەك لە توركیا و پەكەكە بەرپرسیارێتی خوێنی باوكی بێتاوانمیان دەكەوێتە ئەستۆ."

لەوەڵامی پرسیارێكدا سەبارەت بە كاریگەریی ئۆپەراسیۆنەكانی توركیا لەسەر هاوڵاتیانی مەدەنی لە هەرێمی كوردستان، سەرچاوەكەی وەزارەتی بەرگری توركیا وتی: "هەمو ئۆپەراسیۆنە سەربازییەكانی كە لەلایەن سوپای توركیاوە ئەنجام دەدەرێن تەنها بۆ بەئامانجگرتنی تیرۆریستانە و بەپێی مادەی 51ی بەڵگەنامەی نەتەوە یەكگرتوەكان ئەنجام دەدرێت كە كە مافی بەرگریكردن لەخۆ دەداتە وڵاتان. 

ئەو سەرچاوەیە دەشڵێت: "هەمو رێكارێكی پێویست دەگیرێتە بەر بۆ رێگری لە بەئامانجگرتنی هاوڵاتیانی مەدەنی و ئەو ئامانجانەش كە دەستنیشان دەكرێن بۆردومان دەكرێن دوای ئەوەی كە بە تەواوەتی ئاشكرا دەبێت كە ئەوانە تیرۆریستن. بەلای سوپای توركیاشەوە، بە ئامانجگرتنی هاوڵاتیانی مەدەنی و ژینگە و شوێنەوارە كلتوری و مێژوییەكان لە ئۆپەراسیۆنەكاندا ەدەغەكراون."

لەمێژە پەكەكە لەلایەن رێكخراوەكانی بەرگریكارەكانی مافی مرۆڤ، وەك ئەمنستی ئینتەرناشناڵ تۆمەتبار كراوە بە رفاندنی هەرزەكاران بەمەبەستی مەشقی سەربازی و پێگەیاندنیان وەك گەریلا، بەهەمان شێوە تۆمەتبارە بە كوشتن و دەستگیركردنی هاوڵاتیانی مەدەنی بە تۆمەتی سیخوڕی. پەكەكەش ئەو تۆمەتانە رەت دەكاتەوە. 

بەوتەی توركیا، لە سەرەتای ئەمساڵد لە چیای گارە 12 دەستبەسەركراوی توركیا و دەستبەسەركراوێكی عێراقی كوژران. پەكەكەش دەڵێت ئەو كژوراوانە بەهۆی بۆردومانی فڕۆكەكانی توركیاوە بون. 

"ئێمە هەست بە مەترسی دەكەین،" ئەمە وتەی بارانی عەبدولجەبارە شێخۆیە كە خاوەنی 50 سەر مەڕە لە ئامێدی. دەشڵێت: "دو لە مەڕەكان بەهۆی پەكەكەوە كوژران و یەكێكی دیكەش بەهۆی بۆردومانی فڕۆكەی توركیاوە."

لە بەهاری 2020دا ئەنقەرە ئۆپەراسیۆنی چنگی هەڵۆی دەستپێكرد دوابەدوای ئۆپەراسیۆنی چنگی پڵنگ كە دوایین ئۆپەراسیۆنی چڕی سەربازیی توركیا بو لە عێراق بەدرێژایی ماوەی شەش ساڵی رابردو. وەزیری بەرگری توركیا رایگەیاند زیاتر لە 150 بنكەی پەكەكە لەڕێێ‌ فڕۆكەی جەنگی و كۆپتەر و فڕۆكەی بێفڕۆكەوان و موشەكەوە بۆردومان كران و سنورەكانی ئامێدی كرانە ئامانج لەگەڵ شنگال و چیاكانی قەندیل. 

بەوتەی محەمەد جومەیلی توێژەر لە گروپی (ئەیروارس) ئەو ئۆپەراسیۆنانە بونە هۆی زیادبونی بەرچاوی قوربانیانی مەدەنی و رونی دەكاتەوە: لەنێوان 27 بۆ 33 هاوڵاتیی مەدەنی كوژران و 23ی دیكەش بریندار بونە ئەمەش نزیكەی دو هێندەی قوربانیانی مەدەنییە بەراورد بە ساڵی 2019.

بەرپرسێكی باڵای سەرۆكایەتی توركیا ئامارەكانی گروپی ئەیروارس رەتدەكاتەوە و دەڵێت: توركیا بەدواداچونێكی ورد و بێوێنەی كردوە لە بەئامانجنەگرتنی هاوڵاتیانی مەدەنی لەكاتی ئۆپەرسایۆنە سەربازییەكاندا. 

زەری كە منداڵێكی ساوایە رەنگە كە گەورەبو نەزانێت كە ئەو بە چ دۆخێكدا تێپەڕیوە. ئەو كە تەمەنی سێ مانگە هەرگیز نازانێت باوكی خۆی (موخلیس ئادەم_تەمەن 28 ساڵ) كوژراوە بەرلەوەی ئەم لە دایك ببێت. لە روداوێكی ناخهەژێندا، ئەو خێزانە وێنەی موخلیسیان بەخاك سپاردوە. وێنەكەی موخلیس ئێستا لە زەریدا دەبینرێت و دەوتریت كە كچەكەی موخلیس تەواو لە باوكی دەچێت. 

ئوتومبێلەكەی ئادەم بەهۆی بۆردومانی ئاسمانییەوە پێكرا لەو كاتەی كە ناوبراو لەسەر رێگای چون بۆ سەیران بو لە مانگی حوزەیرانی ساڵی رابردو. هیومان رایتس وۆچ چاوپێكەوتنی لەگەڵ ئەو شایەتحاڵانەدا كردوە كە تاڕاددەیەكی زۆر پێشبینی ئەوە دەكەن رەنگە پیاوەكان لە خاڵی پشكنینەكانی پەكەكەدا رێگەیان لێ بگیرێت بەرلەوەی بكرێنە ئامانج. 

"رەنگە توركیا ئەوە بەهەند وەربگرێت كە تەنانەت ئەگەر بێتو زانیاریی لابوبێت سەبارەت بەوە بونی هاولاتیانی مەدەنی لە شوێنی بۆردومانەكان، ئەوا بەهای هەڵمەتە سەربازییەكەی لە كوشتنی گەریلاكانی پەكەكە بەو مانایە دێت كە گوێ نادات بە زیانگەیاندن بە هاوڵاتیانی مەدەنی. رەنگە توركیا سوربونی خۆی پیشان بدات لەوەی كە ئاگاداری هەبونی هاوڵاتیانی مەدەنی نەبوە لە ناوچەكە،" ئەمە وتەی (چریس ودس)ە كە بەڕێوەبەری ئەیروارسە. دەشڵێت: "لە كارەكانماندا زۆر جار روبەڕوی ئەو جیاوازییە دەبینەوە لەنێوان قوربانیانی مەدەنی و سەربازیدا."

وەزارەتی بەرگری توركیا وەڵامی داواكارییە تایبەتەكانی نەدایەوە بۆ پێدانی زانیاری زیاتر لەبارەی دەنگۆی هێرش بۆ سەر هاوڵاتیانی مەدەنی. 

هیچ كام لەو خێزانانەی كە گاردیان چاوپێكەوتنی لەگەڵ كردبون لە دێرەلوك و شیلادزێ، نە پشتیوانییان بۆ دابین كرابو نەقەرەبوش كرانەوە چ لەلایەن حكومەتی هەرێم و چ لەلایەن توركیاوە، تەنانت ئاگاداری ئەوە نین كە هەر رێكاری تایبەت بە لێكۆڵینەوە گیرابێتەبەر لەبارەی ئەوەی بۆچی و چۆن كەسە ئازیزەكانیان كرانە ئامانج و گیانیان لەدەستدا. 

ئەحمەد نورەدین محێدین كە براو برازاكەی لە مانگی مایسی ساڵی رابردو چونیان بۆ درەو كوژران، رایگەیاند: "تەنانەت هیچ سیاسییەك نەهات بۆ لامان قسەمان لەگەڵ بكات و دڵنەواییمان بكاتەوە." وەزیری بەرگری توركیا وەڵامی هیچ پرسیارێكی نەدایەوە لەبارەی ئەو هێرشە. 

وتیشی: "ئێمە لەئێستادا زۆر ئەترسین لەوەی بچین بۆ درەو لەناوچەكە. هەریەك لە پەكەكە و توركیا هیچ هۆكارێكیان بەدەستەوە نیە بۆ ئەوەی لێرە بن. ئەوان تەنها بۆ تێكدانی ژیانی ئێمە لێرەن."

تەنانەت بەرلەوەی توركیا ئۆپەراسیۆنەكانی چڕبكاتەوە لە ساڵی 2020، توڕەیی خەلچكی لەو دۆخە لەناو ئامێدا كڵپەی سەند. ساڵێك بەرلەو بەرەوپێشچونە سەدان خۆپیشاندەر لە شیلادزێ هێرشیانكردە سەر بارەگایەكی سوپای توركیا لە دەوروبەری شارەكە و بەوهۆیەوە پێكدادان رویدا و لانی كەم 10 كەس بریندار بون و منداڵێكی تەمەن 13 ساڵیش فیشەك بەر سەری كەوت و گیانی لەدەستدا. 

"ئێمە هەست دەكەین كە گەمارۆ دراوین، ئازادیمان نیە و پێمان وایە ئەمە گرتوخانەیەكە كە بە شاخەكان دەورەدراوە." ئەمە وتەی یەكێك لە خۆپیشاندەرەكانە كە بەهۆی ترسی لە سزای دەسەڵاتدارانی ناوخۆ نەیویست ناوی ئاشگرا بكرێت. 

بەوتەی دیندار زێباری رێكخەری راسپاردە نێودەوڵەتییەكان لە حكومەتی هەرێم، پەرلەمان لە پڕۆسەی هەڵسەنگاندندایە بۆ قەرەبوكردنەوە. كاریگەریی ئۆپەراسیۆنە سەربازییەكانی توركیا بۆ سەر هاوڵاتیانی مەدەنی بێگومان كاریگەرییەكی بەرچاوە. هیچ كام لە حكومەتی عێراق و حكومەتی توركیا هەنگاویان نەناوە بە ئاراستەی گەیشتن بە دەرەنجامێكی عادیلانەو شیاو و گونجاو بۆ قوربانیانی مەدەنی. 

بۆ هەمو ئەو مەینەتیاننەی كە بەهۆی شەڕ و پێكدادانەكان لە عێراق هاتونەتە كایەوە، ستراتیژی ئەنقەرە واپێدەچێت كە پشتیوانی لێ بكرێت لە ناوخۆدا كە ئەویش بەوتەی (the Armed Conflict Location & Event Data Project) ئەو ستراتیژە ناكۆكی و پێكدادانێكی ئاسمانی و نابەرابەرە

بەوتەی ئەو رێكخراوە، پێكدادانە سەربازییەكان بە رێژەی 60% لەناوخۆی توركیا ل ساڵی 2020دا زیادیكروە بەراورد بە ساڵی 2019 زیادیكردوە.

بەڵام بەلای خەڵكی ئامێدییەوە، شەپۆلی توندوتیژییەكان خۆیان دوبارە دەكەنەوە بە شێوازی مەترسیدار.

تەمار ئەمین تەمار، تەمەن 66 ساڵ بەهۆی شەڕ و پێكدادان لە ساڵی 1997 كچەكەی و دایكی لەدەستداوە. كوڕەكەشی بەهۆی بۆردومانی فڕۆكەی توركییەوە لە ساڵی 2017 كوژرا و شەش منداڵی كوڕەزای  بێ باوكی بۆ جێ ماوە. خودی تەمار خۆی قاچی راستی لەدەستداوە لەو كاتەی كە شوانی مەڕو ماڵاتەكانی دەكرد لە 2018 و مینی پێدا تەقییەوە، ئەو پێی وایە كە ئەو مینە لەلایەن پەكەكەوە چێنرابو. 

ئەو دەڵێت: هەمو ساڵێك جموجۆڵەكانمان سنوردارتر دەكرێت. ئێمە ئازادییەكانمان لەدەت دەدەین، بەڵام من ترسم لەوە هەیە منداڵەكانم بچنە دەرەوە بۆ یاریكردن. پێشبینی ئەوە دەكەم لە هەر ساتێكدا بكرێنە ئامانج. 

لە یانەیەكی كۆمەڵایەتیدا لە شیلادزێ خزمەت دەكات، كەسێك كە پێشتر پێشمەرگە بوە سەیری هەواڵەكان دەكات و ئاخر دەنگی تەلەفزیۆنێكی كۆنی بەرز كردوەتەوە و دانیشتوە. بەدەستێكی قڵیشاوەوە كە تەزبیحێكی بەدەستەوەیە و بەردەوام جگەرە دەكێشێت، هەمو ئەمانە رەنگدانەوەی ئەوەن كە چۆن جەنگ گۆڕاوە لە سەردەمی گەنجێتییەوە. 

تایەر ئەحمەد یەكێك لە بەتمەنترین پیاوەكانی ناو ئەو یانەیە دەڵێت: "شەڕی ئێمە شەڕی تفەنگ و تۆپهاوێژ بو. ئێستا شتەكە جیاوازە. ئەوكات تەكنەلۆجیا وەك ئێستا نەبو." پاش ئەم وتەیەی ئەحمەد بۆ ماوەیەكی درێژ بێدەنگی باڵ بەسەر دۆخەكەدا دەكێشێت و بۆ رۆژی دواتر لە تەلەفزیۆنەوە دەبیسترێت كە زنجیرە بۆردومانێكی ئامانی توركیا بەڕێوەیە و دو منداڵ بریندار بون و شەدان مەڕو ماڵاتیش گیانیان لەدەستداوە. 

ئەو دەڵێت: "ئێمە ویستمان شاخەكان كۆنترۆڵ بكەین ئەوكاتەی كە پێشمەرگە بوین و شەڕی سەداممان دەكرد. ئێمە ئەوكات دەبو ژنەكانمان بناردایەتە شارۆچكەكانی وەك شیلادزێ بۆ ئەوەی سوتەمەنی و خۆراكمان بۆ بكڕن. ئێستا ناتوانین بچینە دەر."

نوسینی: بیسان مەككێرن، ئادەم گنیچ
وەرگێڕانی لە ئینگلیزییەوە: فەلاح حەسەن
سەرچاوە: گاردیان