17/07/2020
جاران
شەو ئەخەوتیت بەیانی کۆمەڵێک پارتیزان لە بنکەیەکیان دابوو ، ئێستا شەو دەخەویت
بەیانی کۆمەڵێک هاککەر لە ئەکاونتەکەیان داوی ، جاران دەست بەسەر رەبایە و بارەگادا دەگیرا ، ئێستا دەست بەسەر ماڵپەڕ و ئیمەیڵ ،
بەڵگەی راستی و دروستیش بۆ ئەم قسانە دەست بەسەردا گرتتنی سەدان هەزار ئیمەیڵی
پنتاگۆن و وەزارەتی دەرەوە و کۆشکی سپی و پاشان بڵاو کردنەوەی بەناوی (بەڵگەکانی
ویکلیکس) ، ئەگەر
جاران (ئەنوەر سادات و بەشیر جەمیل و جۆن کەنەدی ) فیزکیەن کوژرابن ئەوا هەر دوێنێ
(١٦-٧-٢٠٢٠) لە تۆڕی کۆمەڵایەتی تویتەر هاککەرەکان (ئۆباما ی سەرۆکی پێشووی
ئەمریکا) و (بەیڵ گەیتس)ی خاوەنی مایکرۆسۆفت و (جەیف بەیزوز)ی خاوەنی ئەمازۆن و
(کۆمپانیای ئەپڵ)یان مەعنەویەن تیرۆر کرد و دەستیان گرت بەسەر ئەژمارەکانیان .
ئەگەر
جاران (هەرقل و هیکتۆر و سپارتا) نەمربوون ئەمڕۆ (جوليان اسانج و دومشيت بيرگ و
مارک زوکەربیرگ) ، ئەگەر لێدان لە ئاسایشی نیشتمانی جاران ئەوە بوبێت کە فڕۆکە خۆی
بکێشایە بە کەشتیەکانی دورگەی (پێرلهاربەر) و تاوەرەکانی (مانهایتن) ، ئەوا لێدان
لە ئاسایشی نیشتمانی لە ئێستادا بریتیە لە شەڕی بایلۆژی و تەکنەلۆژی و شەڕی ناو
تاقیگەکان کە (سارس و کۆرۆنا) نزیکترین نمونەیانن ، ئەگەر جاران سوپا بجوڵێنرایە
بۆ داگیرکاری ، هەر ئەم هەفتەیە (روسیا) لە رێگەی هێرشی ئەلکترۆنی ویستی دەست
بگرێت بەسەر ئەنجامی پێکوتەکانی زانکۆی کامبریدج.
ئەو
چەکە پێشکەوتوانەی کە ئێستا لە دنیادا دەفرۆشرێت و بازرگانی پێوە دەکرێت و
پارەیەکی زۆر و مرۆڤێکی زۆر تیایدا دەبنە سوتماک ، لە نیوەشەوێکدا لە رێگەی
کۆدەکانیەوە هەر لە لایەن دەوڵەتانی بەرهەمهێنەر بەو کەس و لایەن و گروپ و
دەوڵەتانەی کە پێیان داون دەتەقێنرێتەوە
ڕەنگە
چیتر (دەستڕاستی) و (نیشانە شکاندن) و (بەجەرگی) و (ماسولکەی بەهێز) کۆمەکی ئەم
شەڕە نەکات ، شەڕەکە نە هی شیرە و نە هی تیرە ، بەڵکو شەڕی تەکنەلۆژیایەکە چیتر
دوژمن لە سەر سنور نیە بەڵکو لە سەر سفرە و لە ژوری نوستنەکانمانە ، دیارە ئەم
شەڕەش پێویستی بە سەرباز و برین پێچ و هەواڵگری نوێ هەیە ،
هەموو
سەردەمێک بە کۆمەڵێک نیشانە و سوخیتەی تایبەت بە خۆی دەناسرێتەوە.
ئەگەر
سەرەتای سەدەی بیستەمدا مرۆڤایەتی گیردۆی دەستی (مەلاریا و سکچون و ڕشانە و پەتای
جۆرا و جۆر و جەنگە یەک لە دوای یەکەکان بوبێتن) ، ئەمڕۆ لەسەرەتای سەدەی بیست و
یەکدا خەڵکی بونەتە قوربانی دەستی ڕیکلام و مۆدێل و میدیا و کۆمپانیا زەبەلاحەکان
و جیهانگیری .
پرسیارەکە ئەوەیە کۆمەڵگایەکی (فیوداڵی) وەک ئێمە ، کە هێشتا ماکەکانی فیوداڵیزم
سنوری (بەها) و (بیرکردنەوە) و ناوەندە ئەکادیمیەکانی ئێمەی تێنەپەراندووە ، ئێمە
دەکەوینە کوێی ئەم دنیا نوێیەوە ؟ ئێمە تەکنەلۆژیا بۆ چی و چۆن بەکار دەهێنین ؟
راستی
ئێمە هێشتا لە بنی ئەم زانستەدا خەریکی یەکتر بوغزاندن و بڵاوکردنەوەی ڕق و
نەهێشتنی بەهاپیرۆزەکانین کە رایەڵەی کۆمەڵایەتی راگرتووین ،
ئێمە
ئیتر دەبێت ئەم سەردەمە نوێیە قبوڵ بکەین ، رەفتارەکانی ، لێکەوتەکانی ،
ئازارەکانی ، بەرگە گرتنەکانی ، هەر وەک چۆن باو باپیرانمان بەرگەی (سەفەربەلک) و
(شیربایی) و (کۆلێرا) و (داگیرکار)ی و ئاوارەیی و کیمیاوی بارانیان گرت ، ئێمەش
مەحکومین کە دەبێت بەرگەی (تیک تۆک) و (سناپ چات) و (لایڤ) و (شەڕە جنێو) و (تۆمەت
) و (سوکایەتی) و (بوهتان) و (ناوزراندن) بگرین و بە بێ دەنگی ڕوخسەت لە (مەحوی)
مەزن بخوازین و بڵێین:-
بە
جێ بێت و نەیەت ئێمە ئیتر ( ڕوو ناکەینە سارا) هەر لێرە شێت دەبین وەک (مەجنون لە
شارا ) بۆ هیچ شوێنێک ناڕۆین ، چونکە ئیتر هیچ شوێنێک ئارام نیە ، لە روی فیزیکی و
دەرونی نە بۆ (ئەسکەندەر) نە بۆ (دارا)
جاران
دەست بەسەر قەڵادا ئەگیرا ، ئێستا دەست بەسەر کەسایەتی ، جاران شەڕ بڕێک لە
ئەخلاقیات و داپۆشینی تیا بوو ، ئێستا پڕبووە لە ئاشکرا کردن و ڕوتکردنەوەی یەکتری
نوقتە
سەری دێڕ .....
.......................................................
*ئەسکەندەر:- مەبەست لە ئەسکەندەری کوری فیلیبی مەقدۆنیایە
*دارا :- مەبەست لە دارویشی سێهەم ، پاشای بنەماڵەی هەخامەنشیەکان بووە
*هیوادارم لە داهاتودا دەرفەت هەبێت زیاتر لە رووە کۆمەڵناسی و مرۆڤناسیەکەی
تۆڕەکۆمەڵایەتیەکان و لێکەوتەکانی بوەستین