چاوپیکەوتن

01:32 - 03/01/2021

کورد بوونی خۆی سەلماندووە و دەیەوێت خۆی چارەنووسی خۆی دیاری بکات‌

پەیسەر

سیامەند موعینی هاوسەرۆکی پژاک -پارتی ژیانی ئازادی كوردستان- باس لەوە دەكات ئەمڕۆ کورد لە گۆڕانکارییەکانی ناوچەکەدا فاکتەرێکی دیاریکەرو بەرجەستەیەو دەیەوێت چارەنووسی خۆی دیاری بكات و كۆتایی بەسەر دەمی لۆزان هاتووەو لەگەڵ ئەوەشدا پێی وایە هاتنی بایدن هیچ لە دۆخی ئێران ناگۆڕێت و لەگەڵ ئەوەشدا نایشارێتەوە كە ئۆپۆزسیۆنەكانی ئێران پەرتەوازەو فرە جەمسەرن.

هاوسەرۆکی پژاک، بە ئاماژەدان بە گۆرانکارییەکانی ناوچەکە و تێپەڕینی قۆناغی لۆزان و هاتنی قۆناغیکی نوێ دەڵێت: کورد بوونی خۆی سەلماندووە و دەیەوێت خۆی چارەنووسی خۆی دیاری بکات، کورد ئەمڕۆ فاکتەرێکی دیاریکەرە لە گۆڕانکارییەکانی ناوچەکە و هەر هێزێک کە هاوپەیمانی کوردەکان بێت، لەم کێبڕکێیەدا سەرکەوتوو دەبێت.

سیامەند موعینی هاوسەرۆکی پارتی ژیانی ئازادی کوردستان- پژاک، لە چاوپێکەوتنێکدا لەگەڵ گۆڤاری ئاڵترناتیڤ، لەسەر چەند تەوەرێک قسەی كردووەو بۆچوونی خۆی و حیزبەكەی خستۆتەڕوو ، لەوانە؛ ئەگەری هەلگیرسانی شەڕی سێیەمی جیهانی لە ناوچەکە، ڕۆڵی کورد لە گۆڕانکارییەکان، سیاسەت و سیستمی دەسەڵاتی ئێران و ئەرکی هێزە دیموکراتییەکان .

سیامەند موعینی بە ئاماژەدان بە شەڕی سێیەمی جیهانی کە بە وەکالەت لە ناوچەکە بەڕێوەدەچێت، گوتوویەتی: کورد هەبوونی خۆی سەلماندووە و دەیەوێت خۆی چارەنووسی خۆی دیاری بکات، دۆخی ناوچەکە دەرفەتی داوە بە کورد تا بەرەو ئازادی و دیموکراسی هەنگاو بنێت.

بەڵام موعینی دەڵێت: بە مەرجی ئەوەی كورد خوێندنەوەیەکی واقیعییانە بۆ قۆناغەکە هەبێت و لە کردەوەشدا ڕێگای ڕاست و دروست هەڵبژێرێت.

بە پێی بۆچوونەكانی هاوسەرۆكی پژاك:  قۆناغی لۆزان تێپەڕیوە و قۆناغی نوێ بژاردەیەکی نوێی لە پێش کوردەکان داناوە، تا بە خوێندنەوەیەکی نوێ ڕێگای ئازادیی خۆیان بدۆزنەوە، کورد ئەمڕۆ فاکتەرێکی دیاریکەرە لە گۆڕانکارییەکانی ناوچەکە و هەر هێزێک کە هاوپەیمانی کوردەکان بێت، لەم کێبڕکێیەدا سەرکەوتوو دەبێت.

دوای هەڵبژاردنەكانی سەرۆكایەتی ئەمریكا بە 3/11/2020 و دۆڕانی دۆناڵد ترەمپ و هاتنە سەركاری جۆبایدن كە بڕیارە لە ناوەڕاستی ئەم مانگە بەدواوە لەسەر كورسی سەرۆكایەتی ئەمەریكا دابنیشێت،
موعینی ئاماژەی بە کاریگەرییكانی ئەو گۆڕانكارییانە لەسەر سیاسەتی ناوچەکەو بەتایبەتی ئێران، كە لە سەردەمی دەسەڵاتی ترەمپدا كێشەی ئابووری و دوورخستنەوەی نێو دەوڵەتی بۆ دروست بووەو ئابوورییەكەی بەرەو تەپین ڕۆشتووە پێی وایە: ئێران فشاریکی زۆری لەسەرە و بێ پشتیوان ماوەتەوە، ناچارە باج بە ئەمریکا بدات، ئەگەر لەگەڵ ئەمریکا ڕێکبکەوێت، سیاسەتی بە سەربازیکردنی کۆمەڵگا توندتر دەکاتەوە و دەسەڵاتەکەی یەکدەست دەکاتەوە، لە ئاستی دەرەوەش ناچارە بە نەرمی نواندن، بە تایبەت لە بەرامبەر ئەمریکا تا بتوانێت بەردەوامی بە دەسەڵاتەکەی بدات، بە بۆچوونی موعینی دەسەڵاتدارانی ئێران پێچەوانەی ڕێڕەوی ڕووبار مەلە دەکەن و لە ئەنجامدا ناچارن کە وچانێک بدەن و بوەستن.

دوای هەڵبژاردنە سەرۆكایەتییەكەی ئەمەریكا بەشێكی زۆر لە ئێرانیەكان  پێیان وایە سیاسەتی بایدن لەبارەی ئێران و ناوچەكەوە لە ترەمپ جیاوازترەو ژمارەیەكی زۆریش لە چاودێرانی ئێرانی بە تایبەتی نەیارەكانی ئێستای ئەو وڵاتە پێیان وایە سیاسەتی ئەمەریكا پرۆتۆكۆلییەو بەهاتن و رۆشتنی سەرۆكەكان گۆڕانیان تێدا درووست نابێت ، سیامەند موعینی لەسەر کاریگەری هاتنی بایدن بۆ سەر ئێران دەڵێت: هاتنی بایدن سیاسەتی گشتی ئەمریکا ناگۆڕێت، لەوانەیە گۆڕانکاریی تاکتیکی بێتە ئاراوە، بەڵام ئێران ناتوانێت لەم قەیرانە هەنووکەییە ڕزگاری بێت، چونکە سەرچاوەی ئەم قەیرانە لە بەڕێوبەرایەتی خراپ و گەندەڵییەکە کە لەناو ئەو سیستمەدا جێگیر بووە و قاچەکانی سیستمی سست کردووەتەوە، ناکۆکی لەناوخۆی سیستم بە ڕوونی دەبینرێت، کە ڕۆژبەڕۆژ قووڵتریش دەبێتەوە.


بەشێك لە چاودێران و میدیا نەیارەكانی ئێران  باس لەوە دەكەن بەشێك لە خراپی ئابووری ئێران بۆ ئەوە دەگەڕێتەوە كە ئێران لە ڕێگەی دەستوەردان لە كاروباری وڵاتانی دیكە بەشێكی زۆری پارەو داراییەكەی دەباتە دەرەوەو ئەوەش كاریگەریی خراپ لەسەر ناوخۆی وڵات و بژێویی و بووژانەوەی كەرتە جۆراوجۆرەكان دەبێت.
لە بەشیکی دیکەی چاوپێکەوتنەکەیدا موعینی بە ئاماژەدان بە سیاسەتەکانی ئێران و دەستێوەردانی لە وڵاتانی ناوچەکە، کە بووەتە جێی نارەزایەتی ئەو وڵاتانە و ئاساییکردنەوەی پەیوەندییەکانیان لەگەڵ ئیسرائیل، دەڵێت: قەیرانی ئابوری و ناکارامەیی بەڕێوبەرایەتی باڵای وڵات، گەلانی ئێرانی بێزار کردووە و گەیاندوویانەتە سنووری تەقینەوە، دەسەڵاتی ئێران لەوە تێگەیشتووە کە دەمێکە ڕەوایەتییان نەماوە و تەنیا ڕێگەی مانەوەیان دروستکردنی کەشوهەوایەکی ترس و تۆقاندن و بە سەربازیکردن و تیرۆر لە ناوخۆیە، بۆیە پرۆژەی دەسەڵات یەکدەستکردنی سیستمە.

سەبارەت بە هەڵبژاردنەكانی ئەمساڵی ئێران موعینی باوەڕی وایە ئێرانیەكان پیلانیان داناوە کە کەسایەتییەکی سەربازی بکەن بە سەرۆک کۆماری داهاتوو، تا لە ئەگەری نەمان و مردنی خامنەیی کۆنترۆڵی وڵاتیان لە دەست نەچێت و دەسەڵاتی خۆیان بپارێزن، دەسەڵاتی دیکتاتۆر و مافیایی ئێران تەنیا شتێک کە بیری لێناکاتەوە دیموکراسی و ئازادییە، چونکە پێچەوانەی خوێندنەوەی ئەوانە.


لەسەر ئەرکی هێزە دیموکراتییەکان لە بەرامبەر سیاسەتی نکۆڵی و سەرکوتکاریی دەسەڵات، هاوسەرۆکی پژاک دەڵێت: بە داخەوە ئەو هێزانەی باوەڕیان بە دیموکراسی هەیە، هێشتا نەیانتوانیوە لە سنووری بیرکردنەوەی سکتاریستی تێپەڕن، نابێت دیموکراسی وەک خەڵاتێک لەلایەن خۆیانەوە بۆ خەڵک ببینن، دیموکراسی پرۆسەیەکی کۆمەڵایەتی-ئابوری و زانستیانەیە، ئەگەر هێزە دیموکراتییەکان لە ڕاستیینەی سیاسیی و کۆمەڵایەتی، کۆمەڵگا تێنەگەن، ناتوانن هێزەکانی دیکەی دژبەری ئێران قبوڵ بکەن.


هەر لەو بارەوە وتی: بە ڕای من کۆنفدراڵیسمی دیموکراتی، بژاردەی گونجاو بۆ چارەسەری قۆناغی داهاتووی ئێرانە، تا هەر گەلێکی ئێران بە شێوازی خۆبەڕێوبەری کاروباری خۆی بەڕێوەببات و لە کاروباری گشتی وڵاتیش هاوبەش بێت، دەرەوەی ئەمە و بە تێڕووانینی شۆڤێنی، کێشە و گرفتە هەنووکەییەکان دەمێننەوە و ئێران ڕووی ئارامیی و ئاسایش نابینێت.

چاودێران بەشێك لە مانەوەی دەسەڵاتی ئێستای ئێران بۆ ئەوە دەگەڕێننەوە كە نەیارەكانی یەكگرتوو نین و پەرتەوازەن، هەربۆیە هەموویان بە جەختكردنەوە لەسەر دروستكردنی بەرەیەكی هەمە لایەنە ئەو راستییە دەسەلمێنن كە نەیارەكانی كۆماری ئیسلامی ئێران فرە جەمسەرو ناتەباو پێكەوە نەگونجاون.

لە کۆتایی چاوپێکەوتنەکەیدا، سیامەند موعینی هاوسەرۆکی پژاک دەڵیت:  ئەرکی هێزە دیموکراتییەکان لەم قۆناغەدا، نیشاندانی هاوسەنگی و تێگەیشتن و یەکڕێزی  و یەکێتی هێزەکان بۆ داهاتووی ئێرانە کە شتێکی ژیانی و گرنگە، دامەزراندنی بەرەیەکی یەکگرتووی هێزە دیموکراتییەکان، پێکهاتوو لە هەموو هێزەکان و باوەڕمەندان بە ئازادی، دەتوانێت بۆ بەڕێکخستن کردنی خۆپیشاندان و ناڕەزایەتییەکان لە داهاتوو بە شێوەی میحوەری تێکۆشان کار بکات.