چاوپیکەوتن

10:35 - 23/01/2019

ریاز دەرار: سوریا ده‌یه‌وێت بێ هیچ گۆڕانكارییه‌ك ناوچه‌كان راده‌ست بكه‌ین‌

پەیسەر پرێس

دوای تویتەكەی دۆناڵد ترەمپ لە 13 ئەم مانگەدا لەبارەی دروستكردنی "ناوچەی ئارام" بارودۆخێكی نوێ لە رۆژئاوای كوردستان و باكووری سوریادا هاتووەتە ئاراوە. ئیدارەی خۆسەر، هێزەكانی سوریای دیموكراتی و باڵی سیاسی ئەم هێزە هەوڵ دەدەن ئەم بارودۆخە نوێیە دەستكەوتەكانیان لەبار نەبات، یان بەلانی كەم هەوڵ دەدەن بە كەمترین زیان بێنە دەرەوە. 

پەیسەر پرێس لە چوارچێوەی پرسەكانی پەیوەست بەدۆخى ئێستاوه‌ دیمانەیەكی لەگەڵ ریاز دەرار، هاوسەرۆكی ئەنجوومەنی سوریای دیموكراتی ئەنجامداوە.
  
ریاز دەرار كێیە؟
خەڵكی شاری دێرەزورە لە رۆژهەڵاتی سوریا. ساڵی 1954 لە دایكبووە. پسپۆری زمانی عەرەبیە، دەرچووی زانكۆی دیمەشقە. بۆ ماوەی 11 ساڵ لە دێرەزور گوتاربێژى مزگەوتەكان و مامۆستایەتی كردووە.

لە ساڵی 2000 بەدواوە وەكو چالاكوانێكی سیاسی لەناو رێكخراوەكانی كۆمەڵگای مەدەنی رۆڵی بەرچاوی گێڕاوە. 

لە پرسەننامەی شەهید "مەعشوق خەزنەوی" كە سمبولێكی سیاسی كۆمەڵگای كوردی بوو، لە ساڵی 2005 گوتارێكی خوێندەوە، بەهۆیەوە لەلایەن دەزگا ئەمنییەكانی سوریا دەستگیردەكرێت، تۆمەتی هاوسۆزی لەگەڵ جوداخوازانی كورد دەدرێتە پاڵ. بەهۆیەوە بۆ ماوەی پێنج ساڵ زیندانی دەكرێت.

ئەندامی دامەزرێنەری ئەنجوومەنی سوریا دیموكراتیە، كە باڵی سیاسی هێزەكانی سوریای دیموكراتیە. لە كۆنگرەی دووەمینیدا بە هاوسەرۆكی ئەنجوومەنی ناوبراو هەڵبژێردرا.

په‌یسه‌ر: دانوستاندنه‌كانتان لەگەڵ دیمەشق لە چ وێستگەیەك دایە؟
ریاز دەرار: لە رێگاى حەمیمیم ( بنكەى سەرەكى سەربازى رووسیا لە سوریا) لە جارێك زیاتر دەستمان بە دانوستانى ناڕاستەوخۆ كرد لەگەڵ دیمەشق. بەڵام دانوستاندنى راستەوخۆ لە مانگەكانى تەمموز و ئابى ساڵى رابردوو ئەنجامدرا.
 
سوریا دەیویست بێ هیچ گۆڕانكارییەك ناوچەكانى رادەست بكەینەوە
ئەم دوو دانیشتنە هیچیان لێ شین نەبوو، چونكە رژێم بەهەمان لۆژیك و هزرى پێشووى نزیكى دانوستان دەبێت. دەیویست بەبێ ئەنجامدانى هیچ گۆڕانكارییەك ناوچەكانى رادەست بكەینەوە. ئەم مەسەلەیە دواى قوربانییەكانى هێزەكانى سوریاى دیموكراتى، هەروەها دواى ئەو گۆڕانكارییانەى بەسەر ناوچەكەدا هاتوون نامومكینە. دیسان پێویستى هاووڵاتیانى سوریا بە نیشتمانێكى سەقامگیر، هەبوونى لێكتێگەیشتن و رێككەوتن خۆى دەسەپێنێت. بۆ سەقامگیرى سوریا، پێویستە دەستوورێكى نوێ، مافى پێكهاتەكان و دابەشكردنى سامانەكان هەبێت. رژێم وەڵامى هەموو ئەم مەسەلانەى نەدایەوە. 

لە ئێستاشدا چاوەڕێ دەكەین كە دانوستاندنى جددى دەستپێبكات. ناوبژیوانى رووسى هەوڵ دەدات بێتە نێوانمان، بەڵام رووسیاى ناوبژیوانیش بێ كێشە نیە.
ئەم ناوبژیوانە بەرژەوەندى هەیە، حیسابى تایبەتى خۆى هەیە، هەوڵدەدات ئێمە خۆى رادەست بكەین و هیچ دەستكەوتێكیشمان نەبێت. هەروەها روسیا فشارەكانى توركیا كە لە بنەڕەتدا بە ئاسانكارى رووسیا دەقۆزێتەوە و دەخوازێت لە پێگەیەكى لاوازدا گۆشگیرمان بكات و مەرجەكانى بەسەرماندا بسەپێنێت. یان دەخوازێت نموونەى عەفرین دووبارە بێتەوە. نەمومكینە ئەم گوشارە ملكەچمان بكات و دەبێت چاوەڕێى دەرفەتى گونجاو بین، بۆ ئەوەى دانوستانى راستگۆیانە دەست پێبكەین. 

په‌یسه‌ر: ئەوەى لە وەڵامەكەتدا تێگەیشتم، متمانەتان بە ناوبژیوانى رووسیا نیە؟
ریاز دەرار: مەسەلە متمانە و متمانەبوون نیە. ئێمە سیاسەت دەكەن، دەستەواژەى متمانە لەناو سیاسەتدا نیە، ئەوەى هەیە بەرژەوەندییە. گەڕانە بەدواى بەدەستهێنانى بەرژەوەندى. بۆیە پێویستە لەسەرمان حساب بۆ پێویستى هاوبەشى هەمووان بكەین. 

په‌یسه‌ر: دواى بڕیارى دۆناڵد تره‌مپ لەبارەى كێشانەوەى سەربازانى وڵاتەكەى لەناو خاكى سوریادا، پەیوەندییتان لەگەڵ لایەنى سورى كردووە؟
ریاز دەرار: بەدڵنیایى گفتوگۆ لەگەڵ لایەنى سورى بە شێوەیەكى ناڕاستەوخۆ لە رێگاى رووسیا ئەنجامدراوە، نەخشەى رێگاى چارەسەریمان خستۆتەڕوو. ئەو نەخشە رێگاى خستوومانەتەڕوو، چەند خاڵێك لە خۆ دەگرێت بۆ چارەسەرى ناكۆكییەكانى نێوان ئێمە و رژێم. هەروەها ئەو خاڵانەش لەخۆدەگرێت كە پێمانوایە كێشەكانى سوریا بەگشتى چارەسەردەكرێن. پێموایە لە رێگاى ئەم نەخشە رێگایە بنەماى دەستووریمان بۆ بەشداریكردنى پێكهاتەكان لە بەڕێوەبردنى سوریا خستۆتەڕوو.

دەربارەى بەڕێوەبردن، زمان و پەروەردە وهەموو كێشەكانى دیكە ئاسۆى چارەسەریمان خستۆتەڕوو. دەربارەى سامانە سروشتییەكان و بەڕێوەبردنى لە هەموو ناوچەكان بیرۆكەى واقیعى و سەردەمیانەمان رادەستى ناوەند كردووە. كێشەیەكى دیكەى گەورەمان لەگەڵ رژێم هەیە، ئێمە سوپایەكى تەواومان هەیە، داعشى لەناوبرد و لە ئێستادا خاوەن ئەزموون و هێزە. دەبێت دیاربكرێت چارەنووسى چى لێدێت لە ماوەى داهاتوودا. ئێمە پێشنیارمان كردووە دواى رێككەوتن ببینە بەشێك لە سوپاى سوریا. بۆیە دەبێت ئەم رێككەوتنە لەسەر بنەماى گونجاو بێت و دەرفەت بۆ هەمووان بڕەخسێنێت بۆ ئەوەى بەشداربن لە وێناكردنى سیاسەتى سوریادا. 

په‌یسه‌ر: هەوڵتان نەداوە، ناوبژیوانێكى دیكە بدۆزنەوە تا جێگاى رووسیا بگرێتەوە؟
ریاز دەرار: رووسیا كاریگەرى گەورەى لەسەر رژێم هەیە. رووسیا بوو ژیانى گەڕاندەوە بۆ رژێم، دواى ئەوەى زۆربەى پێگەكانى لەدەست دابوو. رژێم دان بەم راستیە دەنێت و نایشارێتەوە. ئەگەر رووسیا و ئێران نەبووایە هێزەكانى ئۆپۆزسیۆن رژێمیان تووشى دۆڕاندن و بنكەوتن دەكرد. ئێمە لەگەڵ رژێم ململانێیەكى راستەوخۆمان نەبووە. ناكۆكیەكانمان سیاسیانەیە، كە دەكرێت بە رێگاى سیاسیانە چارەسەر بكرێت.

كێشەكە ئەوەیە هەر لایەنێكی عەرەبی گرووپێكی سوری قیت كردۆتەوە

ئێمە تەنیا بەرەنگارى داعش بووینەتەوە، توانیمان تێكبیشكێنین و دووریبخەینەوە. ئەو ناوچانەمان رزگاركرد كە رۆژێك لە رۆژان رژێمى بەجێیهێشت. لە ئێستاشدا دەخوازین لە رێگاى بەڕێوەبەرایەتى خۆمان بیگەڕێنینەوە بۆ سوریا. بۆ ئەوەى ببێتە وڵاتێكى یەكگرتوو، بەڵام دەبێت بگەڕێتەوە بۆ سوریەكان كە ئێمەش خۆمان بە سورى لە قەڵەم دەدەین. داوا دەكەین ئەو مافانەمان بۆ بگەڕێنەوە كە لە سایەى ئیدارەى ناوەندى توند لێمان زەوتكراوە. 

په‌یسه‌ر: ناكرێت پەنا بۆ (میسڕ) ببەن بۆ ئەوەی جێگای رووسیا بگرێتەوە ببێتە ناوبژیوان لە نێوان ئێوە و رژێمدا؟
ریاز دەرار: لاریمان لەسەر هیچ لایەنێكی عەرەبی نیە، بۆ ئەوەی بەشداری لە دانوستاندن بكات. بەڵام كێشەكە لەوە دایە ئەم لایەنانە بەخۆیان ناخوازن، چونكە حیساب و بەرژەوەندی تایبەتیان هەیە. ئەگەر میسڕ بێ، یان وڵاتانی كەنداو یان ئۆردون هەموویان بەم شێوەیە بیردەكەنەوە. وەكو ئەنجوومەنی سوریای دیموكراتی داوامان لەم لایەنانە كردووە، بۆ ئەوەی كرانەوەیەكی پراكتیكی سەرەتایی دروست ببێت، بۆ گۆڕینەوەی نامەكان دەربارەی نموونەی چارەسەری. كێشەكە ئەوەیە هەر لایەنێكی عەرەبی گرووپێكی سوری قیت كردۆتەوە، یاریەكە لە رێگای ئەم گرووپە بەڕێوەدەبات. وەكو "مینبەری قاهیرە" لە میسڕ، "هەیئەی دانوستان" لە عەرەبستانی سعودی هەروەها "ئیتیلافی سوری" لە ئەنقەرە. كەواتە هەموو لایەنەكان گرووپێكیان هەیە لە رێگایەوە دانوستاندن لەگەڵ مەسەلەی سوریادا دەكەن. 

ئێمە لە سوریادا بەراوردمان لەسەر بەرەنگاربوونەوەی داعش كرد، بۆ ئەوەی هەبوونی خۆمان بسەلمێنین. پێمانوابوو كە چارەسەریەك دێتەگۆڕێ، ئیدارەی ئەمریكا بەشداری لەم چارەسەریەدا دەكات. چونكە یەكێك لە بانگەشە سەرەكیەكانی ئەمریكا، نەكشانەوە بوو تا بەرقەراربوونی چارەسەری سیاسی. بەڵام رارایی سیاسەت و بڕیارەكانی ئەمریكا وامان لێدەكەت متمانەمان بە ئەنجامەكان نەبێت. 

په‌یسه‌ر: دوای بڕیاری ئەمریكا سەبارەت بە كشانەوەی هێزەكانی لە رۆژئاوادا، جێمس جێڤری نوێنەری ئەمریكا بۆ شەڕی داعش داوای لێ كردن پەلە نەكەن لە دانوستاندن لەگەڵ رژێم. كاردانەوەی ئێوە چیبوو لەسەر ئەم داوایە؟
ریاز دەرار: ئێمە لە سەرەتادا چووینە فەڕەنسا بۆ ئەوەی گفتوگۆ لەبارەی رۆڵی ئەم وڵاتە لەناو هاوپەیمانی نێودەوڵەتی بكەین، داوامان لێكرد لەناوچەكەدا بمێنێتەوە بۆ ئەوەی كاریگەری لەسەر سیاسەت دروست بكات. وەڵامێكی بەسوودمان وەرنەگرتەوە،  لەبارەی توانای مانەوەیان دوای كشانەوەی ئەمریكا. هەمووشیان سەرسوڕمابوون بە بڕیارەكە. ئێمە توانامان هەیە تا لەناوچەكە سیاسەت بكەین، بەبێ ئەوەی رێگا بدەین بۆشایی گەورە دروست ببێت.

بەو توانەیەی هەمانە رووبەڕوی هەڕەشەكانی توركیا دەبینەوە

سەرەتا پەیوەندیمان لەگەڵ رژێم بەر لەم رووداوە بووە، ئەو پەیوەندیە بۆ ئەم ئامانجانە بووە كە ئێمە دیاریمان كردوون. پێشموانیە ناكۆك بێت لەگەڵ چارەسەری سیاسی كە هەموو لایەنەكان بە ئەمریكاشەوە داوای دەكەن. ئێمە لەسەر ئەم ئاراستەیە دەڕۆین، دانوستاندن لەگەڵ رژێم، شەڕ لەگەڵ داعش دەكەین و هاوپەیمانی لەگەڵ ئەوانە دروست دەكەین كە دەخوازن ببنە هاوپەیمانمان. لەهەمان كاتدا بەو توانەیەی هەمانە رووبەڕوی هەڕەشەكانی توركیا دەبینەوە. 

په‌یسه‌ر: نیازی دۆناڵد ترەمپ لەبارەی "ناوچەی ئارام" چۆن دەخوێنەوە. ئایا نیازی ترەمپ لەگەڵ داواكاریەكانی ئێوە دایە، یان لەگەڵ داواكاریەكانی توركیا دایە؟
ریاز دەرار: بیرۆكەی ناوچەی ئارام لە دەمی ترەمپ هاتە دەرەوە، لە سەردەمی كەمپینی هەڵبژاردنەكانی سەرۆكایەتی ئەمریكادا.
بیرۆكەكە پاراستنی ناوچەكان لە بۆمبارانی ئاسمانی لەخۆ دەگرت تا دەگەیشتە پاراستنی مافی خەڵكی مەدەنی كە لەبنەمادا ئەوانە داواكاری هەموومان بوو. بەڵام خوێندنەوەی ئەو كاتە لەگەڵ ئەو شتەی ئەمڕۆ دەگووترێت جیاوازە.

ئەمڕۆ ئەم ناوچەیەی لەژێر دەستی ئێمە دایە ئارامە، پارێزراوە بەهۆی هەبوونی ئەمریكا لەناوچەكەدا. بەڵام هەڕەشەكانی توركیا دوای بڕیاری كشانەوە، ناچاریكردن حساب بۆ چۆنیەتی بەرەنگاربوونەوەی ئەم هەڕەشانە بكەن. ئەوەی دیار دەبێت تورك ویستیان بیرۆكەی "ناوچەی ئارام" كە لە تویتەكەی ترەمپ پەیدابوو، بقۆزنەوە و هەوڵ بدەن بیرۆكەكانیان بخەنەڕوو. كە بە واتای كۆنتڕۆڵكردنی بەڕێوەبردنی ناوچەكە دێت. لە راستیدا دەبێت ناوچەكە لە لایەن هەردوولا بپارێزرێت و چەكداری تێدا نەبێت و لایەنێك هەڕەشە لە لایەنەكەی دیكە نەكات. ئەمە پێناسەی ناوچەی ئارامە، بەڵام تورك دەخوازن جیهان بە خوێندنەوەی خۆیان خەریك بكەن، كە چەكدارەكانی سەر بە توركیا لەناوچەی ئارام دەگیرسێنەوە، هەروەها ئەمڕۆ مەسەلەی گەڕاندنەوەی ئاوارەكانی بۆ ناوچەی ئارام خستەسەر قسەكانی پێشوو. 

دەبێت ئاوارەكان بگەڕێنەوە ناوچەكانی خۆیان كە بەجێیان هێشتووە

ئەم قسانەی توركیا بەتەواوەتی لە دەرەوەی لۆژیكە، دەبێت ئاوارەكان بگەڕێنەوە ناوچەكانی خۆیان كە بەجێیان هێشتووە. هەروەها ئێمە زۆرجار بە شاندەكانمان گوتووە كە ناوچەكانمان دەتوانێ ئاوارەكان لەخۆ بگرێت. 

په‌یسه‌ر: پێتوایە بەڕێوەبەرایەتی توركیا توانیوتەی ئەمریكا رازی بكات بە بیرۆكەی ئەو ناوچەی ئارامەی كە خۆی دەیەوێت؟
ریاز دەرار: پێموایە تویتەكانی ترەمپ ئەوەنده‌ی بۆ ناوخۆی ئەمریكایە نیو ئەوەندە بۆ دەرەوە نیە. لەوانەشە دەرەوە ئەم تویتانە بەكاربێنێت. ئاماژەكانی ئەردۆغانیش بەهەمان شێوە بۆ ململانێی ناوخۆی توركیایە. هەڵبژاردنی شارەوانی لە پێشە، دەخوازێ خۆی وەكو تاكە سەرۆك بسەپێنێت كە دەتوانێ چارەسەری بۆ هەموو كێشەكان بدۆزێتەوە. 

پێموانیە ئەنجامەكان بەم شێوەیە بێت كە ئەردۆغان دەخوازێت

ئەمەش ناچاری دەكات لە پێشبینیەكانیدا زێدەڕۆیی بكات و ناوچەكە تووشی مقۆ مقۆ و ناكۆكی بكات. پێموایە مەسەلەكە بۆ هەردوولا مەسەلەی ململانێیە لەگەڵ ناوخۆیاندا، لە دەرەوە بەكار دەهێندرێت. پێموانیە ئەنجامەكان بەم شێوەیە بێت كە ئەردۆغان دەخوازێت. پێشموانیە ئەوەی ترەمپ گووتوویەتی بەم شێوەیە جێبەجێ بكرێت، چونكە واقیع لەسەر زەوی گۆڕانكاری بەسەردا دێت، بەو پێیەی ئەمریكا وڵاتێكی دامەزراوەییە، حساب بۆ ستراتیژیەكانى هەبوونی ئەمریكا لەناوچەكەدا دەكات. 

په‌یسه‌ر: چارەسەری قەیرانی سوریا بەبێ رێككەوتنی ئەمریكا – رووسیا زەحمەتە ئەگەر مەحاڵیش نەبێت. پێتانوایە ئەم دوو زلهێزە لەسەر چارەسەری سیاسی بۆ سوریا رێككەون؟
ریاز دەرار: بەڵێ، چارەسەری لە سوریادا بەرقەرار نابێت بەبێ رێككەوتنی ئەم دوو لایەنە. ئەم دوو وڵاتە لە شوێنی دیكە نەوەكو لە سوریا ناكۆكی و جیاوازیان هەیە.

بەڵام ململانێكە لەسەر خاكی سوریا ئەنجام دەدەن. پەیوەست بە رووس، دوای ئەوەی لەگەڵ ئێران و توركیا بوونە هاوپەیمان زۆر پێشكەوتن، كە من ناوی دەنێم "هاوپەیمانی رۆژهەڵات". ئامانجی ئەم هاوپه‌یمانییە، بەرەنگاربوونەوەی ئەمریكا بوو لە سوریادا. دوای كۆبوونەوەی لوتكەی تەهران ئاماژە بە داگیركردنی ئەمریكا بۆ خاكی سوریا لە هەڵكشان دابوو. خیتابی سەرەكیان بووە:" دەبێت ئەمریكا لە سوریادا بكشێتەوە، ئەمریكا دەخوازێت سوریا پارچە بكات".

چەندین جار لاڤرۆڤ ئەم دەستەواژانەی دەگوتووە، سەركردەكانی ناو ئەو هاوپەیمانیەتیەش بەهەمان شێوە. هەروەها وەلید موعەلیم (وەزیری دەرەوەی سوریا) لە تویتەكانیدا هەمان شتی دووپات دەكردەوە. هەموو ئەمانە دوای كۆبوونەوەی لوتكەی تەهران لە نێوان سەرۆكی ئێران، رووسیا و توركیا دەستی پێكرد. مەبەست لە پڕۆسەكە هەبوونی ململانێی ئەمریكا – رووسیایە. ئەمریكا لەلای خۆیەوە دەخوازێ كارتەكان بگۆڕێت و تێكەڵیان بكات لە رێگای بڕیاری كشانەوەی هێزەكانیدا. هەوڵەكانی ئەمریكا تێكدانی هاوپەیمانی سێ قۆڵیە، یان بەلانی كەم تێكدانی هاوپەیمانی رووسیا – توركیایە، لە رێگای جوڵەكانی كە بە بڕیاری كشانەوە دێتەگۆڕێ. بەڵام بەداخەوە ئەم ململانێیە لەسەر حسابی دواڕۆژی گەل و خاكی سوریا دەبێت.

په‌یسه‌ر: دوای بڕیاری كشانەوەی ئەمریكا، هەڵوێستی ئەرێنیمان بینی لە فەڕەنسا و بەریتانیا. پێتوایە ئەم دوو وڵاتە درێژە بە هەڵوێستەكانیان بدەن؟ ئەم دوو وڵاتە دەتوانن ئەگەر هێرشی سەربازی بۆ سەر رۆژئاوای كوردستان ئاستەنگ بكەن؟

ریاز دەرار: پێموایە دەتوانن لە رێگای بەكارهێنانی پێگە و هەبوونیان لەناو ئەنجوومەنی ئاسایشی نێودەوڵەتی، كە رۆڵێكی بەهێزیان هەیە لە دەركردنی بڕیارەكاندا، هێڕشی سەربازی بۆ سەر رۆژئاوا ئاستەنگ بكەن. لە مانگی ئادار یان نیسانی داهاتوودا سەرۆكایەتی ئەنجوومەنی ئاسایشی نێودەوڵەتی دەدرێتە ئەڵمانیا و فەڕەنسا. دەكرێت ئەمە بەكاربێنن بۆ وروژاندنی چەند تەوەرەیەك لە بەرژەوەندی باكووری سوریا. لەگەڵ ئەوەش بەریتانیا و فەڕەنسا لەناوخۆیاندا چەندین كێشەیان هەیە كە لە كێشە و ململانێیە دەرەكیەكان دایاندەبڕێت. 

بەردەوامبوون لەسەر هێڵی سێیەم مومكینە ببێتە هۆی بێ رۆڵكردنی ئێمە

په‌یسه‌ر: لە ساڵی 2013 عەبدوڵا ئۆجه‌لان لەبارەی ململانێكانی ناو سوریا و رۆژئاوای كوردستان پێشنیاری (ستراتیژی هێڵی سێیەمین)ی كرد، كە خۆی لە پشتگیری نەكردنی رژێم و ئۆپۆزسیۆنی سوری دەبینێتەوە. لەژێر رۆشنایی ئەم گۆڕانكاریانەی روویانداوە و روودەدەن، كاتی ئەوە هاتووە ئەم ستراتیژیە گۆڕانی بەسەردا بێت؟

ریاز دەرار: هێڵی سێیەم لە كاتێكدا گونجاو دەبێت كە لەناوچەكەدا سەقامگیری هەبێت و ململانێ لە ئارادا نەبێت. لەگەڵ دەستپێكردنی قەیرانی سوریادا هەوڵماندا سیاسەت بە گوێرەی هێڵی سێیەمین بكەین. نەبووینە بەشێك لە رژێم و ئۆپۆزسیۆن. هێشتا هەوڵ دەدەین بە گوێرەی بنەماكانی ئەم هێڵە بڕۆین، بەڵام وەكو دەبینن، ئێمە لەهەموو چارەسەریەكان دوورخراینەوە، ئێمە بەشێك نین لە جنێڤ، بەشێك نین لە چارەسەری سیاسی، بانگهێشتی كۆبوونەوەكان دەربارەی سوریا ناكرێین و بەشداری تیادا ناكەین. سەرەڕای ئەوەی ئێمە بووین ئەركی سەرەكی و گرنگمان جێبەجێكرد، كە نەوەكو تەنیا سوریا بەڵكو هەموو جیهانمان لە مەترسی تیرۆر پاراست. ئەم رۆڵەمان بە ئەرێنی و تەواوی دڵسۆزی جێبەجێكرد، هەروەها بۆ یەكێتی سوریا كارمان كرد. بەڵام لایەنەكانی دیكە ئاڵای جیاواز لە یەكێتی سوریا بەرز دەكەنەوە، پابەندن لەگەڵ دوژمن و نەیارانی سوریا. لەگەڵ ئەوەشدا ئەوان بانگهێشت دەكرێن و ئێمە بانگهێشت ناكرێین. بۆیە بەردەوامبوون لەسەر هێڵی سێیەم مومكینە ببێتە هۆی بێ رۆڵكردنی ئێمە، بەرەو پاشكۆیەتی ئاراستەمان بكات. 

هەوڵ دەدەین بگەینە لێكتێگەیشتن لەگەڵ هەردوولا

په‌یسه‌ر: چارەسەر چیە؟ ئایا لەناوخۆتاندا لە بارەی ئەم چوارچێوەیە گفتوگۆتان كردووە؟
ریاز دەرار: نەخێر ئێمە رۆڵێكی دیكە دەبینین. بەبێ ئەوەی دەستبەرداری هێڵی سێیەمین بین، لایەنی ئەرێنی لە لایەنەكانی دیكە دەبینین و دانوستاندی لەبارەیەوە دەكەین. كەواتە ئەوەی دەیكەین هەوڵدانە بۆ پەیوەندیكردن بە هەموو هەنگاوە ئەرێنیەكان ئەگەر سەر بە ئۆپۆزسیۆن بێت یان رژێم. هەوڵ دەدەین بگەینە لێكتێگەیشتن لەگەڵ هەردوولا، بۆ خزمەتی چارەسەری سیاسی.