خەڵکی خەمناک ، مرۆڤی مل کەچ !

11/05/2022

عه‌لی حه‌مه‌

خوێنی دەسەڵات وەک ئاوەدانی و شارستانی وایە ئەبێ بەشادەمارەکانی شاردا بڕوات ، وڵاتی وێرانە و بێ خزمەتگوزاری لە نەبونی ئەو خوێنە  یا هەستەی لێپرسراوان دایە کە بە شادەمارەکانی ژێرخان و بنیاتنانەوەی نیشتیماندا  ناڕوات !


هاوڵاتی لەسایەی حوکمڕانی دەسەڵاتی ستەمکاردا دەبێتە کەسێکی ئیفلیج و تەنانەت هێزوتوانای بەسەر ماڵوموڵکی خۆشیا نامێنێت !

ئەنجامی ٣٠ سی ساڵ لە حوکمدارێتی خۆیی ، بەرهەم هێنانی تاکێکی خەمناک و ترسێنراو  و کۆمەڵگەیەکی شیرازە لێکترازاو و گەلێکی پەرتبوە.

مرۆڤی خەمناک و بریندار لە بەرامبەر زوڵمی دەسەڵاتدا لەرواڵەتدا تاکێکی مل کەچ دیارە بەڵام لە رووە شاراوەکەیدای دوژمنیەتی !

مرۆڤ هەر تەنها بریتی نیە لە تاک ، بەڵکو مرۆڤ واتە ؛ شارستانیەت ، کۆمەڵگە ، رۆشنبیری ،پرسیار، مێژوو .

لە چاخی ستەمکاریدا هاوڵاتی هێز و دەسەڵات و هەموو ئامرازێکی لەدەست دەردەهێنرێت ، دەنگی کپ دەکرێت و توانای دەربڕینی راو بۆچون و پاراستنی ماف و کەرامەتیشی نامێنێ ، تادەگاتە ئەو ئاستەی هاوڵاتی لەژێر دەسەڵاتی ستەمکاردا دەبێتە جەستەیەکی وشک و ئیفلیج و دەستبەستراو بەجۆرێک کە هێزی بەسەر ماڵوموڵکی خۆشیەوە نامێنێ.

دنیای دواکەوتوو ، دەرئەنجامی  دنیای دەسەڵاتی زۆردارە ، کە بەهای هاوسەنگی نێوان دەسەڵات و خەڵک تێک دەچێت و دەگاتە رادەی رق و بوغزاندنی بەرامبەر ، لەم بارەدا مرۆڤی مرۆڤایەتی خۆی لەدەست دەدات ، بەها و نرخی نامێنێ.

لە جێگەی پەیوەندی هاوکێشەی ( من و تۆ ) کە (یەکسانی و داننان بە مرۆڤ بونی یەکتری و مافی بوونی دابین دەکرد ) ، پەیوەندیەکە دەگۆڕێ بۆ ( من و ئەو شتە ) ، ئەو شتە ئەو بونەوەرەیە کە دانی پیانانێ ، بە مرۆڤی نازانێ ، هیچ بەها و نرخێک بەژیانی و بە پیرۆزیەکانی نادا  .. بەو مانایەی کە شتێکە دەتوانێ هەموو شتێکی بەرامبەر ئەنجام بدا وەک ( زۆریلێکردن ، ملکەچپێکردنی ، ئازاردانی ، کوشتنی ، برسیکردنی ، تۆقاندنی ) ئەوە مرۆڤی خەمناکە ، مرۆڤی دنیای دواکەوتوو ، مرۆڤێک کە دەسەڵات و پیاوە گەورەکان وەک کەسێکی ئاسایی نایبینن ! ، هیچ سۆزو خۆشەویستیەکی بەرامبەر نامێنێت و بەهیچ جۆرێ هەست بە ئازار و چەوساندەوەی و پێویستیەکانی ناکات .

نوسەری دیاری میسری (مستەفا علی ) ئەڵێ ؛ لە واقیعیدا مرۆڤی دواکەوتوو بە٣ سێ قۆناغدا تێ دەپەڕێ ،قۆناغی جەوساندنەوە و مل کەچکردن و یاخی بوون ) ، قۆناغی دەردەسەری و ملکەچ کردنی مرۆڤی دواکەوتو بە تاریکترین و ناهەموارترین قۆناغی مێژوویی کۆمەڵگە ناودەبات کە وەک سەردەمی مانەوەی لەناو شکستدا وێنا دەکات و لەبەرامبەردا ئەو قۆناغە بۆ دەسەڵاتداری ستەمکار وەک رۆژان و سەردەمی زێڕینی ناودەبات ، بەڵام لەناو ئەو دۆخە خراپ وداروخاوەی کۆمەڵگادا رەگی یاخی بون و بەگژداهاتنەوە نەشونما ئەکات و کۆمەڵگە سازو هاندەدات بۆ هەستانەوەو بەرگری چونکە مرۆڤی خەمناک ، راستە لە روواڵەتدا مرۆڤێکی مل کەچە ، بەڵام لە ناخ و روە شاراوەکەیدا دوژمنی دەسەڵاتی ستەمکارە و گیانی دوژمنانەی لەدەمارەکانیدا ئەجووڵێتەوە ، کە ئەم هەستە ، ئەم یاخی بون و بەگژداهاتنەوە لە باوەشی دەسەڵاتدا بە بێ دەنگی و بەهێواشی وەک پشکۆیەکی ژێر خۆڵە مێش بە شنە بایەک ئەگەشێتەوە و کڵپە ئەکات ، ئەم چرکە ساتانە چرکە ساتە مێژووییەکانی گۆڕان و هەستانە و ئاڵوگۆری ریشەیین وەک ئەو راپەڕینانەی وڵاتانی عەرەبی کە رووداوی شۆک ئامێز و یەکلایی کەرەوەبوون لە رووخانی رژێمە ستەمکارو زۆردارەکانی ناوچەکە .