11:47 - 11/01/2019
عێراق بۆته وڵاتی "مافیا"كان
به‌رپرسانی ئه‌مریكا له دواین لێدوانیاندا بۆ ئاژانسه‌كانی
هه‌واڵ ئاشكرایانكردووه، به‌هۆی ده‌ستتێوه‌ردانی ئێران و پاڵپشتیكردنی چه‌كدار و
گروپی جیاواز جیاواز، عێراق بۆته وڵاتێكی مافیایی.
ڕۆژنامه‌ی "واشنیگتۆن پۆست"ی ئه‌مریكی بڵاویكردۆته‌وه،
به‌رپرسانی ئه‌مریكا ئاماژه‌یان به‌وه‌كردووه " میلیشیاكان له هه‌ندێك
ناوچه‌ی سوننه‌نشین بڵاو بوونه‌ته‌وه، له‌وێش باره‌گای سیاسیان داناوه، خاڵی
پشكنینیان هه‌یه وسه‌رپه‌رشتی رێگا سه‌ره‌كییه‌كان ده‌كه‌ن، له‌و خاڵه پشكنینانه‌ش
باج و سه‌رانه له بارهه‌ڵگره‌كانی نه‌وت و خۆراك و شتومه‌كی ناوماڵ وه‌رده‌گرن."
ڕاپۆرته‌كه ئاماژه‌ی به‌وه كردووه، كه هه‌ندێك له
پیاوانی میلیشیا چه‌ندین تاوان هاوشێوه‌ی مافیاكان ئه‌نجامده‌ده‌ن، داوا له كۆمپانیا
بچووكه‌كان ده‌كه‌ن كه پاره‌یان پێ بده‌ن تاوه‌كو بپارێزرێن و شۆفێرانی
ئۆتۆمبیلیش ڕاده‌گرن تاوه‌كو پاره نه‌ده‌ن ناهێڵن بڕۆن.
ئه‌و رۆژنامه ئه‌مریكیه باس له‌وه ده‌كات، هه‌ندێك چه‌كداری
ئه‌و ناوچانه كاتێك گه‌ڕاونه‌ته‌وه، كه چه‌كدارانی ده‌وڵه‌تی ئیسلامی له عێراق
و شام (داعش) له ناوچه‌كانیان نه‌ماون و حكومه‌ت رێگه‌ی پێداون بگه‌ڕێنه‌وه
ناوچه‌كانیان."