ڕاپۆرتی جیهانی

09:25 - 02/12/2018

ئەو فیلمانەی دەبێت هەموو رۆژنامەنوسێك بیانبینێت‌

ئه‌رسه‌لان تۆفیق

ئێمە بۆ ئەوە نابینە رۆژنامەنوس بۆ ئەوەی ناوبانگ پەیدا بكەین، ئەركی سەرشانی ئێمەیە كە حەقیقەت و راستەقینەكان نیشان بدەین، دەبێت فشاری هەمیشەیی بین بەسەر سەركردەكانمانەوە تا ئەو كاتەی وەڵاممان دەست دەكەوێت – رۆژنامەنووسی ئەمەریكی / هیلین توماس .

 

لەنێو هەناوی ئەو هەموو كێشە مرۆییانەی كە هەیە، لەنێوان ئەو هەموو وەرەقەیەی سیاسیەكاندا، هەركات رۆژنامەنوس پرسیارێكی لا دروست بوو، دەیكاتە پرسیار، پرسیار تەنها بۆ كۆكردنەوەی زانیاری نیە، بەڵكو بۆ دۆزینەوەو بەدەرخستنی راستەقینەكانە، گەڕان بە دوای هەواڵدا ئەوكاتانە دەست پێدەكات كە دەسەڵات رووە راستەقینەكانی روداوەكان دەشارنەوە، لێرەدا راگەیاندنكار  نیشانەی پرسیار دەكاتە هۆكارەكانی گەڕان و كنەكردن، هەركەس بووە رۆژنامەنووس واتە هەموو شتێك دەبێتە جێگەی دووبارە سەرنج دانەوەو پرسیار كردنەوە لەسەری، ئامانجیش كاریگەری دانان یان گۆڕینی ڕێرەوی رووداوەكانە.
لەم راپۆرتەدا هەندێك لایەنی جیاوازی رۆژانەی ژمارەیەك رۆژنامەنووس باس دەكەین، دەبینین (دژ بەیەك) و (نارەحەتی پیشەیی) بەرەو روویان دەبێتەوە ئەوەش تەنها لەبەر ئەوەی رۆژنامەنووسن و هیچی تر.

كاتێك رۆژنامە دۆخی سیاسی دەگۆڕێت
رۆژی 17/ حوزەیرانی/1972 یەكێك لە پاسەوانەكانی بینای (وتر گیت/Watergate ) لە پایەتەختی ئەمەریكادا (واشنتن) دەبینێت شریتی لاستیكی لە هەموو دەرگاكانی بیناكە دەدرێت، پاسەوانەكە گومانی لا دروست دەبێت ئەو پۆلیسانە بۆ ئەوە هاتوون  بۆئەوەی لە دۆخەكە دڵنیاببنەوە، پۆلیس دێت و سەرجەم شوێنەكانی بیناكە دەگەڕێن، پێنج كەس دەستگیر دەكەن لەبەر ئەوەی ئامێری (گوێگرتن –تنصت)یان داناوە لەسەر هەموو قسەو گۆفتوگۆكانی بارەگایەكی (حیزبی دیمموكرات).
رۆژنامەی (واشنتن پۆست-The Washington Post) وەك زۆرینەی رۆژنامەكانی تر بەدواداچوونیانی چڕیان كرد بۆ روداوەكە، بۆ ئەوەی بزانن وەك هەر روداوێكی تر چیە و چی روو دەدات. بە پێی بوچوونەكانی بەڕێوەبەری نوسینی ئەو كاتەی رۆژنامەكە(بن برادلی -Ben Bradlee)، روداوەكە ئەوەندە گرنگ نیە، بۆ ئەو مەبەستە رۆژنامەنوسێكی تازەكاری گەنج (بۆب ودۆرد-Bob Woodward) رادەسپێرێت بۆ ئەوەی كاری لەسەر بكات.
بە تێپەڕبوونی كات، تا دەهات راستیەكان دەردەكەوتن، بە شێوەیەك (ودۆرد)بۆی روون بویەوە پەیوەندی توندوتۆڵ و بە هێز هەیە لە نێوان ئەو پێنج كەسە و دەزگای هەوڵگری ئەمەریكی (CIA) لەوێوە (برادلی) بۆی دەردەكەوێت كە كێشەكە تەنها هەڵكوتانە و سەر گوێگرتنێكی ئاسایی بێت، هەر بۆیە  رۆژنامەنووس (كارل برنستین - Carl Bernstein)ی راسپارد كە ببێتە هاوكاری (ودۆرد) بۆ ئەوەی لێكۆڵینەوەیەكی وردی رۆژنامەوانی تێدا بكەن.
پاش ماوەیەكی درێژ و هەڵدان بۆ كۆكردنەوەی سەرەداوەكان، ئەو دوو رۆژنامە نووسە گەشتنە كۆمەڵە زانیارییەكی ئێجگار مەترسیدار، كە دەگەشتنە ئەوەی بوونی هەڵكوتانە سەرو گوێگرتنی مەترسیدار كراوە بەتایبەتی لەسەر وەزارەتی (داد) و (FBI) و (CIA) و تەنانەت  تا دەگاتە كۆشكی سپیش. بە بڵاوكردنەوەی ئەو زانیاریانە لە رۆژنامەی واشەنتۆن پۆست دا بووە هۆی جوڵاندنی رای گشتی ئەمەریكی و ئەمەش بووە هۆی دروست بوونی قەیرانێكی سیاسی گەوەرە كە دواتر ناوی لێنرا (ووتر گیت -Watergate scandal ).
ئەم قەیرانە سیاسیە كۆمەڵێك گۆڕانكاری گەورەی بەدوای خۆیدا هێنا و دیاترینیان  دەست لەكار كێشانەوەی سەرۆك (ریتشارد نیكسۆن-Richard Nixon-)و دوو لە گەورە راوێژكارەكانی بوو، ئەو بابەتە تەنها ئەوە نەبوو كە سەرۆك كۆمار تاوانبار بكرێت، بەوەی كە گوێ گیراوە لە حیزبی دیموكراتی ركابەریان و ئەوەشی لە مەكتەبی لێكۆڵینەوەی فیدراڵی شاردۆتەوە، بەڵكو كۆتاییەكەی گەشتە ئەوەی لە مانگی ئابی 1974 بەتەواوەتی دەست لەكار بكێشێتەوە.
ئەو چیرۆكەی لە پێشەوە باسكرا چیرۆكێكی خەیاڵكرد نیە، بەڵكو چیرۆكێكی راستە قینەیە و لە كتێبی (All the President's Men ) دا تۆمار كراوەو لە هەمان ساڵدا چاپ و  بڵاوكراوەتەوە لە نوسینی هەردوو رۆژنامەنووس (درۆد و كارل برنستین)، ئەم كتێبەش بووەتە مادەی خاوی فیلمێك هەر هەمان ناوی كتێبەكەی لێنراوەتەوە و دوای دوو ساڵ لە دەرچوونی كتێبەكە فیلمەكە لە مانگی نیسانی 1976 دا بەرهەم هێنراوە.
ئەو فیلمە لە دەرهێنانی (ئالان جای باكۆلا) و نواندنی (رۆبرت دیتفۆرد) لە رۆڵی (دۆر بوب ودورد) وە داستین هوفمان لە رۆڵی (كارل برنستین)دا  جیسۆن روباردس لە رۆڵی (بن برادلی)دا. تێچووی ئەم فلیمە نزیكەی (8.5) ملیۆن دۆلاری تێچوەو  بە هۆی بینەری زۆریەوە بڕی 70 ملیۆن و 600 هەزار دۆلار خێری كردووە تەنها لەنێو خۆی وڵاتە یەكگرتوەكانی ئەمەریكادا.
ئەم فیلمە پێشوازییەكی فراوانی جەماوەری و بازرگانی لێكرا، 17 خەڵاتی جۆراو جۆر و 4 خەڵاتی ئۆسكاری بۆ باشترین تێكست وەرگرتووە.

رۆژنامەی بەدوادا چوون
(سپوت لایت - Spotlight)بەشێكی سەرەكی رۆژنامەی (بۆستن گلوپ- Boston Globe) ) ە كە بەیەكێك لەكۆنترین رۆژنامەی بەدواداچوونەكانی ئەمەریكا دێتە ئەژمار، ستافەكەیان لە كۆمەڵێك رۆژنامەنووسی نهێنی پێكدێت كە خۆیان تەرخان كردووە بۆ بەدوادا چوونی كێشە گەورەكان و هەر بابەتێكیش چەندین مانگ و لەوانەش ساڵی بوێت.
سالی 2001 لە لایەن سكرتێری رۆژنامەكەیانەوە سەرە داوێكیان دەدرێتێ‌ كە زۆر ئاڵۆز و پڕ لەمەترسی بوو، ئەو روداوە رای گشتی ئەمەریكاو تەنانەت جیهانیشی دەوروژاند، سەرەداوەكەش ئەوەبوو لەیەكێك لە رۆژنامە ئاساییەكاندا هەواڵێكی بچووك هاتووە (لەناو كەنیسەیەكی كاسۆلۆكی شاری بۆستن دا قەشەیەك دەستدرێژی سێكسی دەكاتە سەر منداڵێك). تیمی بەدوادا چوونی رۆژنامەكە دەكەونە شوێن هەواڵەكە، لەكاتی كاركردندا تێدەگەن چەندین روداوی لەوە گەورەتر هەیە، دەیەها روداوی هاوشێوە بوونیان هەیە، دەیان قەشەی كاسۆلۆكی تاوانبارن بە دەستدرێژی سێكسی بۆ سەر منداڵانی تەمەن بچووك لە جۆرەها شوێنی بۆستن دا.
تیمی رۆژنامەوانی بۆستن لایت بە سەرۆكایەتی رۆژنامەنووس (روبی روبنسۆن) گەیشتنە ئەو ئەنجامەی كە ئەنجامدانی دەستدرێژی سێكسی بە ئاگاداری كەنیسەی كاسۆلۆكی بووە، بەو مانایەی سزای گونجاوی لەبەرامبەر ئەو قەشانەدا نەگرتووەتە بەر، تەنها ئەوەندەی كردووە لە كەنیسەیەكەوە بیانگوازێتەوە بۆ كەنیسەیەكی تر، تیمەكە بەباشی كارەكانی خۆی كردووە بەچڕی كەوتۆتە كۆكردنەوەی بەڵگەكان، لەمیانەی لێكۆڵینەوەكاندا دەركەوتووە كە قەشەو كەنیسەكان لەكارێكی زۆر قیزەون و نامرۆڤانەوە گلاون، كێشەكە گەیشتە دادگاو دەركەوت كە (ئیدارە-ئەبریشە) كەنیسەی بۆستن 450 كێشەی بەكارهێنانی سێكسی منداڵانیان لەبەردەستدایە. ئەمە بووە هۆی ئەوەی كە (كاردینال برنارد لو) ئەسقەفی كەنیسەكانی كاسۆلۆكی بۆستن دەست لە كاربكێشێتەوە، لەبەر ئەوەی تاوانبار كرابوو بە چاوپۆشیكردن لەو قەشانەی كە منداڵانیان بۆ بابەتی سێكسی بەكار هێناوە لە ئەبریشەكەی ئەودا.  
ئەو چیرۆكەی پێشوو چیرۆكێكی راستەقینەیە، فیلمی (سبوت لایت)ی لە ساڵی 2015 دا لێبەرهەم هاتووە، فیلمەك لە نوسینی جوش سینگر، دەرهێنانی (توم مكارسی). نواندنی (مایكڵ كیتون) لە رۆڵی دور والتر روبی روبسۆن، وە (مارك رافالۆ )لە رۆڵی (مایك ریزندس). تێچووەكەی  20 ملیۆن دۆلاری ئەمەریكی بوو، داهاتی ئەو فیلمە تەنها لە ناوخۆی ئەمەریكادا گەیشتە 45 ملیۆن دۆلار و كۆی داهاتەكەی لە هەموو جیهاندا گەیشتە 91 ملیۆن دۆلاری ئەمەریكی.
كاندیدی 119 خەڵاتی بەدەست هێناوە دوو لەوخەڵاتانە ئۆسكار بووە بۆ باشترین سیناریۆ لە هەمان ساڵدا.

 

دزەی شەو ... رۆژنامەنوسی بێ ئەخلاق..  
(Nightcrawler) فیلمێكی تاوان و پڕ لە خرۆشانی ئەمەریكیە ناوەرۆكی فیلمەكە لە دەوری دزێك دەخولێتەوە ناوی (لویس بلوم) دوای ئەوەی كە زۆر بەدوای ئیش دا دەگەڕێت و لەزۆر دەرگا دەدات بەڵام دەستی ناكەوێت، لەكاتی گەڕانەوەی دا بۆماڵەكەی رودواویكی ئۆتۆمبێل روودەدات ، بە رێكەوت رێی دەكەوێت لە تیمێكی رۆژنامەوانی بە كامێراو سەرجەم پێداویستیەكانی رۆژنامەوانەییەوە و بەدوای وێنەگرتن  و دۆزینەوەی تاوانەوەن بە شێوەیەكی گشتی.
(لو) دەكەوێتە پرسیاركردن لە شێوەی ئیش كردن ئەو رۆژنامەنوسانە، یەكێك لە رۆژنامە نوسەكان دەڵێت ئێمە سەربەخۆ كاردەكەین و گرتەكانمان دەفرۆشینەوە بە كەناڵەكان و پارە پەیدا دەكەین، ئەم بیرۆكەیە بە دڵی (لو)وە دەنوسێت، دوای تاقیكردنەوەی چەندین هەوڵی نابەكام، هێڵە گشتیەكانی كاركردن تێكەڵ دەكات، ئەو نازانێت كە رۆژنامەوانە یان خودی تاونكار و بەشداربووی رودوەكان. لەگەڵ تێوەگلانی (لو) لەو دونیا تازەیە، ئەخلاقی رۆژنامەوانی (لو) تێكدەشكێت و دەبێتە یەكێك لە تاوانكارەكان بۆ ئەوەی بتوانێت ببێتە دەست پێشخەر و دروستكەری هەواڵی رۆژنامەوانی. لەو رێگەیەشەوە بووە خاوەنی ملیۆنەها دۆلار  لەبەرامبەر كارەكانیدا.
فیلمی (دزەی شەو) لە مانگی ئۆكتۆبەری 2014 بەرهەم هات، بڕی 8.5 ملیۆن دۆلاری تێچوو، كۆی داهاتی ئەو فیلمە 50 ملیۆن دۆلار بوو ، تەنها لەنێوخۆی ئەمەریكادا بوو بەخاوەنی 32 ملیۆن دۆلار. فیلمەكە لە ئامادەكردن و دەرهێنانی (دان جیلروی) و نواندنی (جیك جیلنهال) لە رۆڵی (لویس بلوم) و رینە رۆسۆ لە رۆڵی نینا رومینیا، وە بیل باكستۆن لە رۆڵی (جو لودر).

 

تۆڕ ... هونەری ئاراستەكردنی هۆشی بینەران
تۆڕ(Network) فیلمێكی گاڵتە ئاكمێزی ئەمەریكیە، روداوەكانی ئەو فیلمە باسی تۆڕەكانی هەواڵ و هۆكارەكانی راگەیاندن دەكات كەچۆن یاری بە هۆش و بیری بینەر دەكەن لە رێگەی هەواڵ و ئەو مادانەی تری راگەیاندنەوە، ئەوەش لە رێگەی تۆڕی تەلەفزیۆنێكی خەیاڵییەوە بەناوی (UBS) وە باس لەو رۆژنامەنوس و میدیاكارانە دەكات كە كاری ئەوان تەنها بۆ وەڵامدانەوەی بینەرە و هیچی تر، هەموو شتێك لای ئەوان رێگە پێدراوەو گوێ بە كاری ئەخلاقی و نائەخلاقی نادەن و تەنها لە پێناوی چەپڵەو زۆری بینەردا هەموو شت دەكەن.
سەرەڕای بڵاوكردنەوەی هەواڵی ناراست و هەڵەبەستراو، یان هاوكاریكردن و گرێبەستی گوماناوی لەنێو سەرەتاكانی رۆژنامەوانی لە تەلەفزیۆنی (یو بی ئێس) و نەبوونی هیچ شەشەفێكی ئەخلاقی رۆژنامەوانی، هەموو روداوە مەرگەسات بارەكان دەكرانە مادەی پێكەنیناوی و فشقیات بۆ ئەوەی زۆرترین بینەری هەبێت، هەموو مەشهەدەكانی ئەو فیلمە جەخت لەسەر هەندێك حاڵەت دەكاتەوە، یەكێكیان دروستكردنی حاڵەتی تێكدانی دەروونی یەكێك لە كچە پێشكەشكارە سەركەوتووەكانەو كاتێك دەیەوێت خۆی بكوژێت وەك گرتەیەكی پێكەنیناوی نیشنانی دەدەن ئەمەش لە پێناوی تێكدانی هەڵسەنگاندن و ژمارەی بینەرەكان.ئەم فیلمە لە مانگی تشرینی دووەمی 1976 بەهەم هێنراوەو لە ئامادەكردنی (بادی شایفسكی) و دەرهێنانی (سیدنی لومیت) ، نواندنی هەر یەك لە (بیتر فینش) لە رۆڵی پێشكەشكار (هوارد بیل) وە ویلیام هوڵدن لە رۆڵی (ماكس شوماخر) بەرپرسی ژووری هەواڵی تەلەفزیۆنی (یو بی ئێس)وە وفای دوناوی لە رۆڵی (دیانا كریستینسن) ژنە بەرپرسی بەرنامەكانی ئەو تەلە فزیۆنە هەروەها (وروبرت دوفاڵ) لە رۆڵی (فرانك هاكیت) بە رێوەبەری تەلەفزیۆن.
ئەم فیلمە هەر لەیەكەم پەخشیەوە رووبەڕووی رەخنەی توند بوویەوە ، 19 خەڵاتی جۆراوجۆری بەدەست هێناو 4 خەڵاتی ئۆسكاری بەدەست هێنا، یەكێك لە خەڵاتەكانی ئۆسكار بۆ نواندنی سەرەكی فیلمەكە بوو، هەروەها دوو خەڵاتی ئۆسكار باشترین ئەكتەر و كۆتا ئۆسكاریش بۆ سیناریۆی فیلمەكە بوو... لە ریزبەندی فیلمە دەستەبژێرەكانی ئەنتەرنێت دا یەكێك بووە لە 250 فیلمە باشەكان بوو.

 

هەواڵی رادیۆ.. خانمە بەهرەمەندێك لە بەرامبەر كاریزمایەكدا
(هەواڵی رادیۆ) فیلمێكی كۆمیدی- رۆمانسی ئەمەریكییە، تەوەرەكانی ئەم فیلمە لە دەوری سێ كەسایەتی دەخولێتەوە كە كاردەكەن بۆ بەرهەم هێنانی هەواڵی تەلەفزیۆنی لەیەكێك لە تەلەفزیۆنە نیشتیمانیەكانی واشەنتۆنی پایەتەختی ئەمەریكا، یەكەمیان (جین كریگ)ە كەسێكی بەتواناو خاوەن بەهرەیەكی تەواوە هەموو ژیانی تەرخان كردووە بۆ كارەكەی، دووەمیان: ئارۆن ئالتمانە، نوسەر و پەیامنێری تەماحین و هاوڕێی نویكی جینە، سێیەمینیش تۆم گرونیك، بێژەری هەواڵە خۆشە تەرفیهیەكانە، ئەو تازە دەست بەكارەكانی كردووەو شارەزایی باشی نیە، بەڵام كەسایەتیەكی كارێزمایی هەیە و كەسێكە هەرچەندە شارەزایی زۆری نیە، بەڵام بوونی لەو شوێنەدا زۆر سوود بەخشە.
تەوەرەكانی ئەم فیلمە بریتین لە كۆمیدی و رۆمانسی، ئەوەش بەشێوەیەكی زۆر كەم  و ناسك، هەمویان پەیوەندییەكی بچووك یان پێكەوە هەیە، سەرەتا ئارون سرا دەكەوێتە داوی عەشقی جین كریگ ، بەڵام ئەو دەكەوێتە داوی عەشقێكی ناسكی تۆم، ترسەكەیان بەوە كۆتایی نایەت كە جین و ئارۆن لەوە گومان بكەن كە تۆم شارەزایی ئەوتۆی نیە بۆ ئەوەی هەواڵەكان پێشكەش بكات لەو تەلەفزیۆنەی پێكەوە كاری تێدا دەكەن، پەیوەندیەكانیان بە هێواشی پێش دەكەوێت، هەر یەكەیان ئەوی تریان بەمەوە دەبەستێتەوە، لەگەڵ ئەمانەشدا هێڵە سەرەكیەكەی فیلمەكە ئەوەیە كە تۆم هەموو رەفتار و ئاكارە جوانەكانی و پیشەی رۆژنامەوانی فەرامۆش دەكات..
فیلمی هەواڵەكانی رادیۆ، لە ئامادەكردن و دەرهێنانی (جیمس بروكس)ە نواندنی (ویلیام هورت) لە رۆڵی (توم گرونیك) وە هۆلی هنتر لە رۆڵی (جۆن كریگ)، وە ئەلبێرت بروكس لە رۆڵی ئارون ئالتمان ، فیلمەكەلە كانوونی یەكەمی 1987 دا بەرهەم هاتووە و نزیكەی 20 ملیۆن دۆلاری ئەمەریكی تێچووە، داهاتەكەشی بریتی بوو لە 67 ملیۆن دۆلار، 51 ملیۆن دۆلاری لەنێو وڵاتە یەكگرتوەكاندا بەدەست هاتووە.
ئەم فیلمە كاندید بووە بۆ23 خەڵات و 7 خەڵاتی ئۆسكار، بەڵام هیچیانی بەدەست نەهێناوە، بەڵام 13 خەڵاتی تری بەدەست هێناوە.

 

 

شوشەی شكاو... رۆژنامەنوسی ساختە ، خێراترین رێگەی سەركەوتن و كەوتنە خوارەوە
شوشەی شكاو(Shattered Glass) فیلمێكی درامی ئەمەریكی كەنەدییە، پشتی بە وتارێك بەستووە كە لە مانگی سێبتەمبەری 1998  لە گۆڤاری (Vanity Fair) بڵاوكراوەتەوە، لە نوسینی نوسەر و رۆژنامەنوسی ئەمەریكی (هاری جیرارد) دیمەنەكانی ئەم فیلمە بە دوای ئەو روداوانەوەیە كە ستیڤن گلاس بەرز دەكاتەوەو لە ماوەی سێ ساڵدا دەبێتە ئەستێرەیەكی درەوشاوە، لە ساڵی 1995 تا 1998 ، نوسینەكانی لە گۆڤاری (The New Republic) بڵاودەكرەوە تا وای لێهات نوسینەكانی بوونە جێگە گومانی سكرتێری نوسینی گۆڤارەكەو تەنانەت خوێنەرەكانی ئەمەش بووە هۆی ئەوەی سەری پیشەی رۆژنامەوانیەكەی بخوات.
دوای ماوەیەكی كەم لێكۆڵینەوە كرا لەبارەی كارە رۆژنامەوانیەكانیەوە، تا دەركەوت كە 27 راپۆرت و چیرۆك و هەواڵی ناراستی بڵاو كردۆتەوە كە كۆی هەمو ئیشەكانی دەیكردە 47 كاری ساختە، بەشێوەیەك زۆرینەی روداوەكانی نێو راپۆرتەكانی ناراست بوون و ئەوانەی تریشی هەمووی خەیاڵكردی خۆی بوون، ئەمەش بووە هۆی ئەوەی ساختەكاری ئەو رۆژنامەنووسە دەربكەوێت و هەر ئەمەش بووە هۆی ئەوەی بەخێرایی ناوبانگی خراپی بڵاو ببێتەوەو بكەوێت، فیلمی شوشەی شكاو لە مانگی تشرینی دووەم 2003 بەرهەم هات،  لەنوسین و دەرهێنانی (بیلی رای) و نواندنی (كریستنسین) لەرۆڵی (ستیڤن گلاس). فیلمەكە 11 خەڵاتی بردۆتەوەو لەنێو بینەراندا پێشوازییەكی گەرمی لێكرا.

 

دانەبڕان چین.. ئایا رۆژنامە دەبێتە هەڕەشە؟
فیلمی (The China Syndrome) فیلمێكی جوڵێنەری ئەمەریكی خەیاڵییە، باس لەوە دەكات جیهان چی بەسەر دێت كاتێك مرۆڤ دەیەوێـت دەست بەسەر سەرچاوەی وزەدا بگرێت، سەرچاوەیەك كە مرۆڤ بە تەواوەتی لێی تێناگات، روداوەكانی ئەم فیلمە باس لە خانمە پەیامنێرێكی تەلەفزیۆنی دەكات بەناوی (كیمبرلی ویلز) لەگەڵ وێنەگرێكەكەی رۆژنامەنوس (ریتشارد ئادامز) دەچنە نێو كێڵگەیەكی بەرهەم هێنانی وزەی ئەتۆمی لە دەرەوەی لۆس ئەنجلۆس كە ناوی فنتانا یە، ئەوەش بە ئامانجی پاراستنی سەڵامەتی تەندروستی و پاراستنی راستگۆیی پیشەیی لەنێو كارگەكەدا.
كیمبرلی تێبینی ئەوە دەكات، لەكاتێكدا كە دەیەوێت راپۆرتێك  ئامادە بكات، هەست بە بوونی جووڵەیەكی نائاسایی دەكات و ئەمەش دەبێتە هۆی ئەوەی كە ستافی كارگەكە نەتوانن وەك پێویست ناتوانن كارەكانیان بكەن، هەرچەندە لە لایەن بەڕێوەبەر و ئەندامانی كارگەكەوە ریتشارد ئاگادار دەكەنەوە كە كارەكەیان رابگرن و وێنە نەگرن لەبەر حاڵەتی ئەمنی، بەڵام ئەو بە نهێنی وێنەی روداوەكان دەگرێت، ئەمەش بووە هۆی ئەوەی كە ئەو كارە بە مەترسی دابنرێن و ئەگەری ئەوە دابنێن كە پاشماوەكانی بڕژێتە نێو ئاوی ژێر زەوی و ئەوەش ژینگە پیس بكات و دووكەڵ و تیشكی زبانبەخش بڵاو ببێتەوە.
دوای ئەوە روداوەكان بەرەو پێشەوە دەچن، موئامەرەو گەلەكۆمەكێ دەكرێت بۆ ئەوەی راستەیكان لە خەڵكی بشارێتەوە بۆ ئەوەی سوودی گەورەی مادییان دەست بكەوێت. فیلمەكە لە مارسی 1979  بەرهەم هاتووە، ئامادەكردن و دەرهێنانی (جیمس بریدجس) وە نواندنی (جین فۆندا) لە رۆڵی كیمبرلی ویلز، وە (مایكل دوگلاس) لە رۆڵی (ریتشارد ئادامز)دا ، پێشنیار كراوە بۆ 15 خەڵات و 4 خەڵاتی ئۆسكار، بەڵام هیچ خەڵاتێكی بەدەست نەهێنا، بەڵام تەنها حەوت خەڵاتی تری بەدەست هێنا..
لەكۆتاییدا، ئێمە ناتوانین باسی سەرجەم فیلمەكانی لەو جۆرانە بكەین، كە باس لە رۆڵی رۆژنامەنووس و رۆژنامەنوسی بووەتە بابەتی فیلمەكان و بابەتی سەرەكی فیلمەكانن، یان بەشێك لە روداوەكانی باس لەوە دەكەن، بەڵام ئەو فیلمانەی كەباسمان كردن، گرنگی و بایەخی تایبەتییان هەیە لە رووی هونەری و سینەمایی یەوە، بەڵام پێدەچێت لەنێو خەڵكیدا زۆر نەبینرابن لەوانەیە بەشێكی پەیوەندی بەوەوە هەبێت كە دەمێك ساڵە بەرهەم هێنراون.

وەرگێڕان له‌ عه‌ره‌بییه‌وه‌: ئەرسەلان تۆفیق