06:24 - 13/08/2020
نزیکەی ٣٠٪ی خوێندنگاکان ناتوانن ئاوی خواردنەوە بۆ خوێندکاران دابین بکەن
یەکێک لە ڕێگاکانی
ڕووبەڕووبوونەوە لەگەڵ کۆرۆنا لە جیهاندا شۆردن و پاکڕاگرتنی دەستە و گرنگییەکی
تایبەتی هەیە.
ڕێکخراوی یونسێف دەڵێت:
سەدان ملیۆن منداڵ هەن لە جیهاندا توانای
جێبەجێکردنی ئەم ڕێکارە خۆپارێزییەیان نیە.
ڕێکخراوی تەندروستی
جیهانی و یونسێف، ئەمڕۆ پێنجشەممە ١٣ی ئاب لە ژنێف ڕایانگەیاند: بۆ ڕووبەڕووبوونەوەی ڤایرۆسی کۆرۆنا نزیکەی
٨١٨ ملیۆن منداڵ لە وڵاتانی جیهاندا کەرەستەی پێویست و ئاوی پێویستیان بۆ
پاکڕاگرتن و شۆردنی دەستیان لە قوتابخانەکاندا نیە.
نزیکەی ٢٩٥ملیۆن لەم
منداڵانە لە وڵاتانی باشووری ئەفریقا دەژین.
لە ڕاگەیاندراوێکی
هاوبەشی یونسێف و ڕێکخراوی تەندروستی جیهانیدا هاتووە:
کە نزیکەی ٣٥٥ ملیۆن منداڵ لە قوتابخانەکاندا
بەلووعەی ئاویان هەیە، بەڵام ئەم قوتابخانانە شوێنیان بۆ دابینکردنی سابون و
شۆردنی تەواوەتی دەستەکان نیە.
نزیکەی ٤٦٢ خوێندکار
دەڕۆنە ئەو خوێندنگانەی کە ئاو و بەلووعەی ئاویان نیە.
لەڕاگەیاندراوەکەدا
ئاماژە بەوە کراوە:
نزیکەی ٣٠٪ی خوێندنگاکان ناتوانن ئاوی خواردنەوە
بخەنە بەردەستی خوێندکاران.
ئەمە لەکاتێکدایە بەپێی وتەی ڕێکخراوی تەندروستی جیهانی،
شۆردن و پاکڕاگرتنی دەستەکان یەکێکە لەڕێگا زۆر گرنگ و ئاسانەکان بۆ ڕێگریکردن لە
تووشبوون بە ڤایرۆسی کۆرۆنا.
هەردوو ڕێکخراوەکەش
ئاماژەیان بەوە کردووە داخستنی خوێندنگاکان کاریگەری نەرێنی لەسەر تەندروستی و
توانای فێربوونی منداڵان بەجێهێشتووە.