04:15 - 08/11/2022
ئاستی سه‌رۆك كاریگه‌ری له‌سه‌ر هه‌ڵبژاردنی نیوه‌ی له ئه‌مریكا هه‌یه
هەڵبژاردنەکانی نیوەی
خولی سەرۆکایەتی ئەمەریکا ڕۆژی سێشەممە ڕێکەوتی 8 ی مانگی یازدە بەڕێوەدەچێت کە ئەمەریکاییەکان
بە میدتێرم " Midterm" ناودێری دەکەن.
زۆرێک لە شارەزایان پێیان وایە ئەدا و ئاستی جەماوەرێتی سەرۆکی ئەمەریکا کاریگەری
گەورەی بەسەر ئەم هەڵبژاردنانەی نیوەی خولی سەرۆکایەتی دەبێت.
لە هەڵبژاردنەکانی ئەمساڵدا،
جگە لە ئەنجامدانی هەڵبژاردن بۆ هەر 435 ئەندامەکەی ئەنجومەنی نوێنەران، هەڵبژاردنیش
دەکرێت بۆ 34 سیناتۆری ئەنجومەنی سینات کە لە 100 سیناتۆر پێکدێت، هەروەها هەڵبژاردنیش
دەکرێت بۆ هەڵبژاردنی فەرمانڕەوای 36 ویلایەت لە کۆی 50 ویلایەتەکەی ئەمەریکا. لە
ئێستادا لەو 36 ویلایەتە فەرمانڕەوای 20 ویلایەتیان کۆمارین و 16 ویلایەتیان دیموکراتن.
ماوەی خولی ئەندامانی
ئەنجومەنی نوێنەران، 2 ساڵە، بۆیە هەموو دوو ساڵ جارێک هەڵبژاردن بۆ هەر 435 ئەندامەکەی
ئەو ئەنجومەنە دەکرێت. بەڵام ئەندامانی ئەنجومەنی سینات (سیناتۆرەکان)، ماوەی خولەکەیان
6 ساڵە و هەڵبژاردنەکانیان کراوەتە سێ خول، لە دوو خولدا هەڵبژاردن بۆ شوێنی 33 سیناتۆر
ئەنجام دەدرێت و لە یەک خولدا بۆ 34 سیناتۆر.
کۆنگرێسی ئەمەریکا کە
لە هەردوو ئەنجومەنی نوینەران و سینات پێکدێت، ڕۆڵێکی سەرەکی هەیە لە حوکمڕانی وڵاتەکە
وە زۆربەی بڕیارەکانی سەرۆکی ئەمەریکا بەبێ ڕەزامەندی کۆنگرێس ناکرێت، بۆیە بۆ سەرۆکی
ئەمەریکا زۆر گرنگە ئەندامانی پارتەکەی زۆرینە بن لە هەردوو ئەنجومەنەکە.